Ta konsolidá interkambio regular entre Hoge Colleges van Staat i SER

WILLEMSTAD, 7 di sèptèmber 2018 – E Hoge Colleges van Staat (HCvS) i e Konseho Sosial Ekonómiko (SER), representá pa nan respektivo lidernan ofisial a reuní den kuadro di nan interkambio regular pa di dos biaha e aña aki djaweps 6 di sèptèmber 2018. E biaha akí e ofisina di  Secretariaatvoering SER/ROA/GOA tabata e anfitrion.

Na e deliberashon a partisipá e Sekretario di Algemene Rekenkamer sra. S. Cathalina,  Ombudsman sr. K. Concincion, Sekretario di Raad van Advies sra. C. Raphaëla i Direktor/Sekretario General di SER sr. R. Henriquez i algun kolega di e respektivo órganonan.

Den un konsulta ta analisá tópikonan di interes general i ta interkambiá konosementu i eksperensia ku otro.

E puntonan di agènda e biaha’kí tabata entre otro aspektonan publisitario relashoná ku e forma di traha i duna konseho, programanan di treinen kohunto i e tema ‘Future of work’.

E representantenan ofisial di HCvS i SER a konfirmá e importansia pa periodikamente keda informá e komunidat tokante nan trabou importante den kuadro di fortifikashon di nos estado di derecho demokrátiko.

Riba potrèt: sr. K. Concincion (Ombudsman), sr. R. Trenidad (Bureau Ombudsman), sra. C. Raphaëla (Sekretaria Raad van Advies), sra. L. Sasso-Hart (konsehero hurídko Algemene Rekenkamer), sra. S. Cathalina (Sekretaria Algemene Rekenkamer), sra. S. Curial-Villarreal (Konsehero Bureau Secretariaatvoering SER/ROA/GOA), i sr. R. Henriquez (Secretario General/Direktor SER).