Konseho di SER riba transporte públiko

Konseho Sosial Ekonómiko (SER) ta duna e konseho akí na Gobièrno di Kòrsou (GdK) riba petishon ku el a risibí 6 di yüli 2018. E petishon ta trata di un akuerdo eksistente i ku ta den ehekushon kaba riba tarifa pa pasahero di bùs chikí i mediano di transporte semi-públiko. Dos biaha pa aña GdK ta ahustá e tarifa máksimo di transporte públiko komo reakshon riba fluktuashon di preis global di energia, partikularmente di gasoil. Meta di e intervenshon di gobièrno ta pa protehá tantu interes di e pasahero komo di e doño di bùs ku pèrmit, ku ta proveedor privá di servisio di transporte.

Kambionan di tarifa ta resultá di no ta basá ekslusivamente riba fluktuashon di preis di energia global. Otro gastunan i faktornan tambe ta influensia e sistema di tarifa. Pa basta tempu, e modelo pa kalkulá tarifa tabata un punto di diskushon entre GdK i e organisashon di operadónan di bùs privá/ doño di pèrmit. Riba petishon di GdK na 2015, pa medio di un estudio empíriko, a hasi un kalkulashon real di averahe di kosto i kantidat di pasahero pa kada ruta. Resultado a mustra ku por baha tarifanan konsiderablemente. Estudio tambe a mustra ku pasaheronan hopi biaha mester paga mas ku e tarifa máksimo. Basá riba un análisis ku SER a hasi, tarifanan por baha basta si kalkulá tarifanan segun gastunan real. Sinembargo, a baha e tarifa máksimo bou di e preis rekomendá den e estudio empíriko menshoná anteriormente. Esaki tin un efekto kumulativo riba futuro ahustenan komo ku  ahuste di tarifa ta sigui kambionan di gastu a base di porsentahe. Ta parse ku e organisashon di operadónan di bùs tin un influensia grandi riba montante di tarifanan, esei ta hasi ku un modelo no tin sentido.

SER ta observá ku e riesgonan di empresario ta minimalisá dor di e manera ku ta disidí tokante e tarifanan, ku komo konsekuensia preisnan haltu, falta di apliká tarifa máksimo i falta di sierto obligashonnan pa shofùr di bùsnan manera orario i konekshon di bùsnan.

Konsekuentemente, pasaheronan ta haña nan konfrontá ku tarifanan muchu haltu, miéntras e mayoria grandi di pasahero ta e grupo di ménos rekurso. SER ta konkluí ku bou di  sirkunstansia aktual e konsumido no ta protehá efektivamente kontra tarifanan haltu. Den e merkado akí ku no ta regulá na un manera efektivo, operadónan di bùs a haña espasio liber pa kontrolá tarifa, pa operá un modelo di negoshi dor di hür e asina yamá shofùr di bùs suplente i pa duna un servisio bastante mediokre.

Un enkuesta ku Fundashon pa Konsumidó a hasi, a indiká ku pasaheronan no solamente ta konsiderá ku e tarifa di bùs ta muchu haltu, pero nan a kualifiká e servisio ku operadónan di bùs privá ta ofresé, relativamente hopi abou. Spesialmente, aksesibilidat, konfiabilidat, disponibilidat (posibilidat di ruta, orario i frekuensia) i serviso na kliente a skor relativamente abou.

Si e tarifa ta muchu haltu, e motivashon propio pa duna servisio di kalidat por bira ménos. Komo ku no tin akseso na alternativanan efektivo, mayoria usario ta dependé riba e mal servisio di transporte públiko.

SER ta konsiderá e situashon akí kaminda tarifa pagabel, aksesibilidat i konfiabilidat di transporte públiko ta na peliger, komo no deseabel pasobra e por kousa efektonan sosio-ekonómiko negativo riba akseso na edukashon, merkado laboral, pasa tempo, fasilidat di salú i aktividatnan sosial. Ademas esaki por kousa efektonan negativo riba produktividat laboral i konsekuentemente riba kresementu ekonómiko.

For di un punto di bista sosio-eknómiko SER ta konsiderá ku un bon evaluashon i revishon di e sistema di transporte públiko no solamente ta deseabel, sino tambe nesesario. Intenshon di e evaluashon i revishon akí mester ta na interes di e pasahero relashoná ku tarifa pagabel, konfiabilidat i aksesibilidat. P’esei SER ta masha kotentu ku e inisiativa ku GdK resientemente a tuma pa instalá un komishon pa desaroyá un sistema permanente di transporte di bùs públiko pa sigurá aksesibilidat, tarifa pagabel, konfiabilidat i siguridat. Promé ku revisá e sistema di transporte públiko, SER ta rekomendá pa desaroyá e vishon di un ekosistema di mobilidat pa atendé e problemátika di mobilidat na Kòrsou na un manera integral. Esaki ta enserá un vishon di un transporte públiko permanente, inovativo, efisiente, pagabel i di kalidat haltu ku ta atendé  nesesidat di pasaheronan (smart mobility).

Ademas, SER ta haña ku ta nesesario pa kondusí un enkuesta tokante e benefisio sosio ekonómiko di un sistema permanente di transporte di bùs públiko. E tópiko prinsipal  mester ta kontribushon di transporte públiko na aksesiblidat, dinamismo i partisipashon sosio-ekonómiko. Si ta establesé tarifanan pa supsidiá transporte públiko òf no, ta parti di e manehonan akí.

Den e konteksto akí, SER ta rekomendá pa hasi un anális sosial di gastu/ benefisio pa midi e rendimentu sosio-ekonómiko di invershonnan proyektá, pa asina sigurá un desishon di maneho bon informá pa desaroyá un sistema di transporte públiko permanente.