Despues di deliberashon bilateral ku mishon di NU

WILLEMSTAD – Riba djaweps 21 di yüni 2018 Konseho Sosial Ekonómiko (SER) a tene un kombersashon bilateral ku e delegashon di Nashonnan Uní (NU) den kuadro di e asina yamá Mainstreaming Acceleration Policy Support (MAPS).
Meta di mishon MAPS ta pa desaroyá un plan di implementashon efektivo pa metanan di desaroyo sostenibel (Sustainable Development Goals, SDGs) pa Kòrsou.

Despues di un presentashon kòrtiku di parti di e delegashon di NU tokante e metanan di desaroyo sostenibel i e trayekto di MAPS a profundisá kon SER komo konseho konsultativo ta mira e problemanan sosialekonómiko aktual na Kòrsou.  A papia riba e ròl ku SER ta ehersé den esakí i kon por duna kontenido na esakí ora ta bai duna konseho riba implementashon di e metanan, SDG, basá riba su posishon independiente den e sistema di estado di Kòrsou.

SER, konsistiendo di representantenan di e sírkulo di doño di trabou i trahadó i ekspertonan independiente a deliberá mas profundo riba esakinan dor di siñalá e problemanan aktual ku mester di atenshon urgente, manera sinkronisashon di enseñansa ku merkado laboral, e stagnamentu largu di ekonomia i e sirkunstansianan di labor riba e isla.

Aspektonan manera inovashon i preservashon di ekonomia tambe a haña hopi atenshon. Ademas a para ketu riba e eksperensianan ku e mishon di NU a obtené ku otro islanan chikitu i su ròl ku el a ehersé ku e otro órganonan di konseho konsultativo.

E kombersashon a finalisá ku SER ta primintí ku internamente nan lo deliberá si dado kaso ta asina kon e por ehersé un ròl signifikativo na momento di duna konseho tokante implementashon di e metanan di desaroyo sostenibel (SDG).