Nota inisial ‘Future of Work’ ta wòrdu aprobá

Willemstad, 12 di yüni di 2018 – Riba 12 di yüni di 2018, durante un di e seri di seshonnan bon bishitá tokante e tema ‘Future of Work’, organisá pa Konseho Sosial Ekonómiko (SER) huntu ku e ministerio di Desaroyo Sosial, Labor i Bienestar (SOAW) a aprobá  e Nota inisial ‘Future of Work’,  kua durante e promé seshon di trabou di 22 di mei 2018 a duna e siñal pa kumisá.

Bou di e presentenan tabatin representantenan di organisashonnan sosial (ngo-nan), komèrsio, enseñansa, prensa, sindikato, siensia i tambe young professionals.

A deliberá intensivamente riba nivel tékniko tokante e kontenido di e konsepto di e Nota inisial basá riba e resultado ku a prepará for di e seshon di trabou di 22 di mei 2018. E Nota ta duna indikashon kon Kòrsou por duna kontenido na e tema ‘Future of Work’, ku lo bai trata, otro aña durante e selebrashon di shen aña di eksistensia di e Organisashon Internashonal di Labor (ILO) na Ginebra, Suisa, kaminda Kòrsou lo partisipá tambe komo miembro di e delegashon di Reino.

Durante e seshon a profundisá riba e oportunidatnan i posibilidatnan di un merkado di labor ku ta kambiando. Aspektonan manera e potensial inovativo di Kòrsou pa sigui desaroyá e pais den un‘smart island nation’ i a trata ampliamente tokante e retonan den e área demográfiko, teknológiko i klimatológiko.

Na final di e diskushon, e presentenan a hasi e adaptashonnan nesesario i a aprobá e dokumentu. Intenshon ta pa ofresé e minister di SOAW e dokumentu ku e petishon pa Konseho di Minister ratifiké.

Manera ku tin un aprobashon gubernamental lo inisiá un diálogo demokrátiko pa hasi e tópiko mas konosí i pa stimulá konsientisashon i kambio di komportashon bou di un skala amplio di e poblashon.

Durante e diálogo demokrátiko lo amplia riba aspektonan ku ILO ta haña relevante, manera entre otro protekshon sosial i oportunidat di trabou pa tur hende; mira tambe http://www.ilo.org/wcmsp5/groups/public/—dgreports/—cabinet/documents/publication/wcms_570282.pdf