Seshon di trabou tokante Futuro di Trabou

WILLEMSTAD, 22 di mei 2018 – Kon e merkado laboral di Kòrsou lo desaroyá den futuro?  E pregunta aki tabata sentral durante un tayer ku Konseho Sosial Ekonómiko (SER) a organisá en koperashon ku Ministerio di Desaroyo Sosial, Labor i Bienestar (SOAW). E tayer a tuma lugá den e sala di reunion di SER na Ansinghstraat.

Mas ku trinta persona for di diferente gremio den nos komunidat, inkluyendo sektor públiko, enseñansa, sentral di sindikato, mundo akadémiko i e komunidat sivil a tuma parti na e tayer.

Minister Hensely Koeiman di SOAW tambe tabata un di e presentenan.

E tayer a enfoká riba e selebrashon di shen aña di eksistensia di e Organisashon Internashonal di Labor (ILO) na 2019, ku pa e okashon akí a pidi miembronan di estado pa inisia diálogonan nashonal tokante futuro di trabou i pa manda e resultadonan komo aporte na ILO.

Durante e tayer a pone atenshon riba dos aspekto spesífiko relatá na e tema prinsipal ‘Future of Work’, esta impakto di faktornan demográfiko (embiehesimentu, migrashon, ets.) riba merkado laboral i e abilidat pa sigui inová pa asina hasi Kòrsou mas kompetitivo den un mundo ku ta kambiando kada biaha mas rápido.

E aporte di e partisipantenan a wòrdu kompilá. Durante un siguiente seshon plenario ku lo tuma lugá dia 12 di yüni 2018, lo deliberá i ratifiká e kompilashon den forma di un nota inisial.