Komunikado
Delegashonnan di Konsehonan Sosial Ekonómiko (SER-nan) di Kòrsou i Aruba di bishita na SER Ulanda, SER Luxemburg i otro órganonan estatal relevante
Den Haag, 13 di òktober 2017 – Den kuadro di e ambishon pa sigui alsa nivel i kalidat di funshonamentu di e Konsehonan Sosial Ekonómiko (SER-nan) di paisnan di Reino den Karibe, un delegashon tékniko, konsistiendo di e direktornan/sekretarionan general di SER-nan di Kòrsou i Aruba, huntu ku algun di nan konseheronan, aktualmente ta di bishita di trabou na Hulanda i Luxemburgo. Inisialmente, SER di Sint Maarten tambe lo a partisipá na e bishita di trabou. Sinembargo pa motibunan opvio (rekonstrukshon di e isla despues di orkan Irma i echo ku SER di Sint Maarten pa lunanan kaba no tin miembronan) nan no a haña responsabel pa djòin nan koleganan di Kòrsou i Aruba.
Meta prinsipal di e bishita di trabou, ku a ser prepará konhuntamente dor di Kòrsou i Aruba, ta pa haña mas tantu informashon posibel riba último desaroyonan i trèntsnan riba tereno di tripartitismo, diálogo sosial, ekonomia di konsertashon i futuro di labor i pa tambe interkambiá di idea ku algun órganonan estatal relevante pa asina SER-nan di Kòrsou i Aruba por sigui profeshonalisá nan trabou, manera stipulá den lei, pa konsehá nan gobièrnu- i parlamentonan riba proyektonan di lei i áreanan di maneho ku un karakter sosial-ekonómiko.
E delegashon a bishitá entre tantu e Fundashon Maatschappij en Onderneming (SMO) na Rotterdam ku ta un ‘think tank’ riba tereno di ekonomia sirkulario (circulaire economie). Aki nan a haña informashon amplio riba kiko ta ekonomia sirkulario, ku básikamente ta un koriente di pensamentu, un sistema ekonómiko / industrial nobo ku tin komo prinsipio básiko ku tur produkto i materia prima por ser resiklá i rebendé pa asina garantisá durabilidat/ sostenibilidat ekológiko, ofresiendo konsumidónan a la bes produktonan di kalidat superior. E konsepto aki riba nivel Europeo ta ganando mas i mas popularidat i diferente empresanan a kuminsá basa nan strategianan ekonómiko i komersial riba e konsepto aki.
Tambe e delegashon a hasi bishitanan orientativo na Ofisina Sentral di Planifikashon (Centraal Planbureau), Ofisina di Planifikashon Sosial-Kultural (Sociaal-Cultureel Planbureau), Ofisina di Planifikashon Ambiental (Planbureau voor de Leefomgeving) i Konseho Sientífiko pa Maneho Gubernamental (Wetenschappelijke Raad voor het Regeringsbeleid) na Den Haag kaminda nan a ser informá ampliamente riba e nesesidat i importansia di akumulashon i interpretashon di data sientífiko komo rekisito básiko pa por yega na formulashon di maneho gubernamental (multi-anual) duradero i responsabel.
E mensahe ku nan a risibí ta ku sin data i/o sifranan aktual i konfiabel, ta praktikamente imposibel formulá maneho gubernamental ku por sirbi i benefisiá komunidat. Den e kuadro aki a deliberá ampliamente riba e ròl krusial ku e órganonan aki, spesialmente Ofisina Sentral di Planifikashon, tin durante di e proseso di formashon di gobièrnu, kaminda tur programa di akshon i/o programa di kampaña elektoral di partidonan polítiko i tambe e akuerdo di gobernashon ta ser kuantifiká i supstansiá ku sifranan real pa asina por determiná si nan ta ehekutabel.
Tambe tabata tin un enkuentro ku funshonarionan haltu di Ministerio di Asuntunan Ekonómiko. Mas aleu e delegashon a sinta na mesa ku nan koleganan di SER di Hulanda kaminda nan a interkambiá di idea ku otro riba diferente área di interes komun i tambe a sondia e posibilidat pa den futuro serkano posiblemente yega na un tipo di kooperashon i interkambio institushonalisá riba nivel tékniko.
Komo ku Konseho Sosial Ekonómiko Hulandes tin profeshonalnan den servisio, spesialisá riba áreanan spesífiko, kaminda netamente tin skarsedat na Kòrsou i Aruba, tin un base sólido pa e kontaktonan riba nivel tékniko redundá den palabrashonnan konkreto kon por hasi uso di e ekspertisio aki.
Den ámbito internashonal e delegádonan di SER-nan di Kòrsou i Aruba tambe a hasi un bishita di kortesia na Conseil Economique Et Social (e SER) di Luxemburgo, kaminda nan a topa ku e presidente, vise-presidente i sekretario-general di e konseho. E bishita aki a ser konsiderá komo unu ku un balor agregá grandi komo ku den e Asosiashon Internashonal di Konsehonan Sosial Ekonómiko i Sosial i Institutonan Similar (AICESIS), Luxemburgo ta ser konsiderá komo un “best practice” debí na e echo ku e la desaroyá, konhuntamente ku nan ofisina di estadístika, un método efektivo kon pa midi bienestar di su habitantenan, hasiendo uso di sierto indikadónan .
E kontakto ku e konseho di Luxemburgo a ser establesé durante e último Asamblea General di AICESIS ku a tuma lugá luna pasá na e kapital di Repúblika Dominikana, Santo Domingo, kaminda SER di Kòrsou unánimemente a ser skohé komo sekretario general athunto di AICESIS pa e region di Latino Amérika i di Karibe.
Durante e enkuentro ku SER di Luxemburgo tambe a papia riba último desaroyonan sosial i ekonómiko riba nivel Europeo.
Direktamente despues di su regreso for di Luxemburgo e delegashon a hasi un bishita di kortesia na minister plenipotensiario na Den Haag señor Anthony Begina. E próksimo dianan e delegashon lo kontinuá ku su gira na Hulanda, kaminda e lo bishitá Ministerio di Asuntunan Sosial i di Labor, munisipio di Amsterdam kaminda lo elaborá riba entre otro e tema di kombatimentu di pobresa, partisipashon den enseñansa i e link entre enseñansa i merkado laboral.
![Delegashonnan_di_Konsehonan_Sosial_Ekonómiko_SER-nan_di_bishita_na_Ulanda-00](https://b2825881.smushcdn.com/2825881/wp-content/uploads/sites/280/2017/10/Delegashonnan_di_Konsehonan_Sosial_Ekonómiko_SER-nan_di_bishita_na_Ulanda-00.jpg?lossy=1&strip=1&webp=1)