Komunikado

SER Kòrsou lo ta representà na reunion di direktiva di AICESIS na Kosta di Marfil, Afrika

Willemstad, 2 di mart 2018

Riba invitashon di presidensia di e organisashon internashonal di konsehonan sosial ekonómiko i institushonnan similar (AICESIS), un delegashon tékniko di Konseho Sosial Ekonómiko (SER) di Kòrsou lo sali djadumingu próksimo, 4 di mart 2018, pa Abidjan, kapital di Kosta di Marfil (Republic Côte d’Ivoire), Oeste di Afrika, kaminda nan lo asistí na e reunion di direktiva di e organismo mundial aki. Durante e último Asamblea General di AICESIS, ku a tuma lugá na sèptèmber di aña pasá na kapital di Repúblika Dominikana, Santo Domingo, a palabrá ku e próksimo reunion di e direktiva lo tuma lugá na e pais Afrikano.

Durante e asamblea general ei, Kòrsou a ser elegí, basá riba statutonan di AICESIS, komo miembro di direktiva di e organisashon aki pa un periodo di dos aña, te ku 2019. Huntu ku Brasil i Repúblika Dominikana, ku tambe a ser elegí komo miembronan di direktiva, Kòrsou lo representá ‘SER-nan’ di region di Karibe i Latino Amérika durante e reunion di direktiva ku lo tuma lugá djaweps dia 8 di mart próksimo.

Temanan spesífiko ku lo ser tratá durante e reunion ei, ta entre otro futuro di AICESIS mes, kooperashon mas estrecho ku Organisashon Internashonal di Labor (ILO) i Kongreso Ekonómiko i Sosial di Nashonnan Uní (ECOSOC). Mas aleu lo ta trata puntonan di agènda fiho manera entre otro adaptashon di relato anual i relato finansiero di AICESIS.

Despues di e reunion di direktiva lo tin un tayer kaminda delegadonan di ‘SER-nan’ di rònt mundu lo interkambiá di idea ku otro riba temanan di aktualidat manera futuro di labor, digitalisashon i su impakto riba ekonomia i merkado laboral.
Pa SER di Kòrsou e puntonan aki ta di importansia ya ku durante di e tayer ‘best practices’ lo keda presentá ku tin relevansia pa konseho- i análisisnan ku SER ta saka.

E delegashon tékniko di SER Kòrsou ta konsistí di direktor / sekretario general sr. drs. Raúl Henriquez i konsehero hurídiko mayó sra. mr. Miloushka Sboui-Racamy.

Share