SER ke probechá implementá IA, pero ta protehá kriterio humano

WILLEMSTAD, 25 di mart 2026 — Konseho Sosial-Ekonómiko (SER) ke sigui hasi uso di manera efektivo i responsabel di hèrmèntnan di inteligensia artifisial (IA) generativo pa sostené su tarea di konseho. E desishon aki ta bin despues ku riba 19, 20 i 24 di mart último un serie di masterclass tokante IA a tuma lugá pa asesornan i empleadonan di SER, na sede di SER na Ansinghstraat.

Pa e órgano di konseho aki, IA no ta un meta riba sumes i ménos ainda un remplaso pa rekurso humano. E teknologia por ta útil pa resumí dosiernan grandi, ordená informashon, mehorá redakshon, hasi komparashonnan i duna splikashon mas kla i aksesibel pa públiko. Pero den loke ta esensial — interpretashon hurídiko, balansá interesnan, sensitividat institushonal i formashon di kriterio den e proseso di konseho — e ser humano ta keda esun derterminante. P’esei, SER ta stipulá komo regla básiko ku por husa IA solamente komo un instrumento di sosten i nunka pa sustituí deliberashonnan tampoko e funshon di konseho.

E enfoke ei, segun un konsepto di guia di e órgano tripartito di konseho, ta basá riba e siguiente tres prinsipionan básiko: responsabilidat humano final, protekshon di datonan personal i garantia di kalidat, integridat, eksaktitut  i verasidat. Den práktika, esaki ta nifiká ku asesor i empleadonan di SER mester hasi uso di IA ku un propósito kla i ku prudensia, evitá di introdusí datonan personal no nesesario, verifiká echo i fuentenan, i semper por splika dikon a huza un hèrmènt, kua dato a  introdusí i ken a revisá e resultado. Si tin duda, e norma ta simpel: no ta hasi uso di e hèrmènt.

“SER ke probechá hasi uzo dje oportunidatnan ku teknologia nobo ta ofresé, sin hasi konseshonnan riba independensia, diligensia i konfidensialidat”, asina Raúl Henriquez, direktor/sekretario general di SER di Kòrsou, a splika. “IA por sostené trabou, pero nunka e por remplasá evaluashon profeshonal ni responsabilidat humano.”

E rumbo ku SER a skohe ta kai den un tendensia mas amplio den sektor públiko, kaminda uso responsabel di inteligensia artifisial generativo ta keda kada biaha mas mará na eksigensianan teknológiko, organisativo, étiko i hurídiko.

Pa SER, uzo di IA no ta un salto den skuridat, sino un eskoho bon pensá: selektivo ora ku por, prudente ora ku mester, i semper na servisio di mihó konsehonan.