Dokumental riba SDG ta pone urgensia di pobresa i siguridat alimentario den spotlight

WILLEMSTAD, 10 di febrüari 2026 —Konseho Sosial Ekonómiko (SER) a fasilitá djabièrnè 6 di febrüari último den su sala di reunion, di forma ekslusivo, un proyekshon di e promé episodio di e serie dokumental The State of the SDGs; Navigating Sustainability on Curaçao. Miembronan di SER, representantenan di organisashonnan di sosiedat sivil, partnernan sosial i otro stakeholdernan a bin huntu pa reflehá riba nifikashon práktiko di e Metanan di Desaroyo Sostenibel (SDG’s) pa Kòrsou.

E SDG-nan ta parti di e Agènda 2030 pa desaroyo sostenibel, ku tur pais miembo di Nashonnan Uní a adoptá na 2015 i ku ta duna direkshon mundial pa akshon koherente den áreanan sosial, ekonómiko i medioambiental. Na Kòrsou, e kuadro di SDG-nan ta integrá den e arkitektura di maneho públiko pa medio di e National Development Plan 2015–2030, kompletá ku un roadmap pa implementashon di SDG-nan ku ta pone énfasis riba implementashon programátiko, koordinashon institushonal, datonan i monitoreo.

Na inisio di e seshon, Raúl Henriquez, Direktor i Sekretario General di SER, a duna bon biní na e invitadonan — na nomber di e presidente den funshon — i a suprayá e rol di SER komo plataforma pa diálogo basá riba evidensia entre partnernan sosial, akadémikonan independiente i organisashonnan di sosiedat sivil. Segun SER, e reto ta pa hasi ku maneho sosio-ekonómiko no ta keda solamente un aliniashon teóriko ku kuadronan internashonal, sino ku e ta ser tradusí den mehorashonnan real den loke siudadonan ta eksperensiá den nan bida di tur dia.

E promé epísodio a pone énfasis riba SDG 1 (sero pobresa) i SDG 2 (sero hamber) i a mustra kon e metanan aki ta bira visibel den práktika na Kòrsou. Sentral den e proyekshon tabata e trabou di e Daily Meal Program, ku ta duna kuminda kayente varios biaha pa siman na hendenan den situashon vulnerabel. Durante e diskushon despues di e proyekshon, a bira pa e presentenan kla ku pobresa i inseguridat alimentario no ta un estadístika, sino un realidat diario pa un parti signifikativo di nos poblashon, kaminda personanan di edat mayó ta esnan mas vulnerabel pa falta di sufisiente medionan finansiero i otro obstákulonan manera eksklushon digital, ku ta limitá nan akseso na informashon- i servisionan esensial.

E konklushonnan akí ta hasi ku e enfoke ku SER a bin ta propagá pa prosperidat amplio (‘brede welvaart’) ta bira indispensabel. Prosperidat amplio no ta mira solamente kresementu ekonómiko, sino tambe kalidat di bida: siguridat di entrada, oportunidat di salú, inklushon sosial i partisipashon den komunidat. Den e perspektiva ei, e agènda di SDG-nan ta yuda pa mara progreso no solamente na indikadonan makro-ekonómiko, sino tambe na loke hende realmente ta sinti i eksperensiá den nan bida diario.

SER a ekspresá su apresiashon pa e inisiadonan i partnernan ku a kontribuí na e insisiativa, inkluyendo The Recycled Pirate | Life Awareness & Innovations, Aisvarya Productions i Club17 Curaçao, pa nan aporte den hasi práktikanan di desaroyo sostenibel mas visibel riba e isla. Segun e team di produksion, e promé epísodio lo bira disponibel pronto riba YouTube i lo tin tambe un proyekshon habrí pa duna mas hende e oportunidat pa sigui i partisipá.