SER ta emití su konseho riba salario mínimo ku ta bai drenta na vigor 1 di yanüari 2026

Willemstad, 22 di desèmber 2025 — Konseho Sosial Ekonomiko (SER) a entregá djaluna último su konseho na Minister di Desaroyo Sosial, Trabou i Bienestar (SOAW), Charetti America-Francisca, enkuanto e proposishon pa adaptá  salario mínimo reglamentario ku ta planiá pa drenta na vigor promé di yanüari próksimo. E proposishon ta pa indeksá salario mínimo bruto pa ora ku 1,8%, basá riba e promedio di 12 luna di e índise di Preis pa Konsumidó (IPC) te ku oùgùstùs 2025. Si aprobá e medida, salario mínimo bruto pa ora lo subi di Cg. 11,72 pa Cg. 11,93 (florin karibeño), i e salario mínimo bruto mensual korespondiente lo ta Cg. 2.066,28, segun e método di kalkulashon ku ta aplikabel.

E proseso pa yega na un konseho a tuma lugá den un tempu rekòr, konsiderando ku SER a risibí e petishon formal pa duna konseho riba e konsepto di e dekreto ministerial konserní apénas dia 15 di desèmber último.

Den su konseho, SER a analisá e proposishon den e kuadro hurídiko di e Ordenansa di Salario Mínimo, teniendo na kuenta inteshon dje legisladó i eksigensianan di seguridat hurídiko i transparensia. Tambe SER a pone e medida den e konteksto sosioekonómiko aktual di Kòrsou, usando datonan disponibel riba preis-, entradanan i dinámika riba merkado laboral, spesialmente den sektornan kaminda salario mínimo ta predominante.

Mas aleu SER a analisá e base di e ahuste proponé manera formulá den e nota klarifikatorio ku ta akompañá e konsepto di e dekreto ministerial di forma krítiko. E órgano konsultivo a wak spesífikamente si e sifranan den e nota ta koherente i basá riba pronóstikonan di e kantidat di trahadónan ku lo benefisiá dor di e indeksashon. Den e mesun konteksto SER a tuma na konsiderashon un analísis di e impakto makroekonómiko ku a ser prepará pa Ministerio di Desaroyo Ekonomiko, basá riba e modelo Curalyse, ku e “koutela” nesesario ku semper ta konta ora ta trata di proyekshonnan ehekutá ku modelo.

E konseho di SER ta basá riba un investigashon profundo di literatura i deskresearch; pa motibu di e tempu hopi limitá, den kua mester a emití un konseho.