Traspaso históriko: Kòrsou ta hasi entrega presidensial di CESISALC na Guatemala

Willemstad/Siudat di Guatemála, 24 di sèptèmber 2025 – Na siudat di Guatemála a tuma lugá djamars último, 22 di sèptèmber, e seremonia ofisial di traspaso di presidensia di e ret regional di konsehonan ekonómiko i sosial i institushonnan similar di Latinoamérika i Karibe (CESISALC). Konseho Sosial-Ekonómiko (SER) di Kòrsou, ku ta tin e liderato durante e úlimo dos añanan, a hasi entrega formal di e presidensia na e Konseho Ekonómiko i Sosial (CES) di Guatemala den un seremonia formal i solemne – kaminda un delegashon di dos persona di SER Kòrsou tabata presente físikamente i e otro miembronan a tuma parti di forma virtual.

Durante e bishita, a presentá e Informe Anual 2025 di CESISALC. Den dje a pone énfasis riba fortalesementu di dialógo sosial institushonalisá den nos región, ampliashon dje membresia di e ret, kreashon di e plataforma ibéroamerikano RICESIS i e kresementu di visibilidat internashonal di CESISALC den foronan internashonal manera Organisashon Internashonal di Trabou (OIT) i Nashonnan Uni.

E presidente saliente, esta SER di Kòrsou, a suprayá e importansia pa sigui modernisá e base legal i institushonal di CESISALC. Den e sentido ei a hasi un apelashon pa revishon profundo di e dokumentonan statutario, pa digitalisá kompletamente tur dokumentashon dje ret i pa introdusí mekanismonan di outo-evaluashon periódikamente. E medidanan aki tin komo meta fortalesé transparensia, legitimidat i resilensia dje ret.

Danki na e hospitalidat i kompromiso di e CES di Guatemala, e entrega akí no solamente ta garantisá kontinuidat di CESISALC, sino tambe ta marka un etapa nobo kaminda koöperashon regional ta bai mas profundo i unidat di región ta keda mas fortifiká.