SER ta konsehá riba proposishon di lei pa introdukshon di impuesto mínimo na Kòrsou

WILLEMSTAD, 20 di mei 2025 — Djaluna 19 di mei último, Konseho Sosial-Ekonómiko (SER) a presentá un konseho formal na Ministro di Finansa demishonario, señor Javier Silvania, tokante e proposishon di lei pa introdusí un impuesto mínimo efektivo pa kompanianan multinashonal ku ta generá ganashi mundial di por lo ménos 750 miyon euro. E proposishon ta inkluí un tarifa mínimo di 15% riba ganashi nèto di kompanianan multinashonal ku ta operá mundialmente, entre otro na Kòrsou. Ku esaki, Kòrsou ta sigui ku e kompromisonan internashonal ku a akòrdá bou di e struktura, denominá komo ‘Pilar 2’ di e Organisashon pa Koöperashon i Desaroyo Ekónomiko (OECD).

A anunsiá e proposishon na fin di 2024 i esaki a ser mandá formalmente na Parlamento di Kòrsou den desèmber di e aña ei. Na mes momentu, Parlamento a demostrá su sosten pa e idea di implementá e impuesto. Awor ku SER a emití su konseho formal, e proseso legislativo ta drenta su siguiente fase, ya ku e proyekto di lei ainda mester haña aprobashon formal di Parlamento. Si aprobá e proyekto di lei aki, esaki lo drenta na vigor ku forsa retroaktivo, te ku 1 di yanüari 2025.

E impuesto mínimo ta trata di garantisá un nivel mínimo di impuesto pa  un kompania multinashonal, ku ta operá na Kòrsou.  Esaki ta prevení ku entradanan di impuesto ta lèk bai pa otro huridikshonan fiskal ku sí ta atené nan mes na normanan internashonal stipulá. E proposishon tambe ta forma parti di un movementu mundial pa frena konkurensia fiskal indeseá entre paisnan i pa stimulá transparensia fiskal.

SER a skohe pa sigui un strategia planifiká den fase i. Motibu prinsipal di esaki ta e desaroyonan geopolítiko aktual, ku ta inkluí, entre otro, kambio den maneho fiskal di Estados Unidos bou di liderato di e aktual presidente sr. Donald J. Trump. E atministrashon nobo di Merka a indiká di ta kontra sierto reglanan internashonal di impuesto ku nan ta mira komo diskriminatorio òf ku tin karakter ekstrateritorial kontra empresanan Merikano. Si e impuesto mínimo di Kòrsou ser interpretá di e forma ei, e isla por tin e riesgo di haña medidanan fiskal resíproko for di Washington.

Den e konteksto ei, SER a pone énfasis riba e importansia di un strategia diplomátiko ku ta koutelosamente strukturá, i tambe riba e posibildat real pa implementá un lei ku – teniendo kuenta ku e konteksto geopolítiko aktual – ta téknikamente i legalmente sostenibel. Pa SER, modernisashon di e sistema fiskal na Kòrsou ta empírikol, pero di igual importansia ta pa tin sufisiente fleksibilidat pa por hasi ahuste- i adaptashonnan fiskal nesesario si e panorama internashonal fiskal eksigí esaki.