“Diálogo no ta un prosedimentu, sino un kultura”

Kòrsou ta presidi e reunion global di AICESIS na Belgrado

Willemstad/Belgrado, 9 di aprel 2025 – Koseho Sosial i Ekónomiko (SER) di Kòrsou a dirigi ku éksito e reunion statutario di Konseho di Atministrashon di AICESIS (Asosashon Internashonal di Konsehonan Ekonómiko i Sosial i Institushonnan Símil), ku a tuma lugá riba 8 di aprel 2025 na Belgrado, Serbia. E seshon aki tabata ko-presidí pa señor John Jacobs, presidente di AICESIS i presidente den funshon di SER di Kòrsou (di manera virtual), i señor Raúl Henriquez, sekretario general i direktor di SER di Kòrsou, ku tabata presente personalmente na Belgrado.

E liderato dual aki a resaltá e ròl stratégiko ku Kòrsou ta hunga den e ret global di organismonan konsultativo sosioekónomiko. Entre desishonnan prinsipal ku a tuma, ta inisio formal di e prosedimentu pa forma un struktura nobo di gobernashon pa AICESIS—un paso strategiko pa garantisá kontinuidat institushonal i renobashon interno, na e momento ku presidensia di Kòrsou ta drenta su fase final na final di òktober di aña aki.

Un yamamentu fuerte pa dialógo sosial

E reunion di e Konseho di Atministrashon a tuma lugá di inmediato despues di e konferensia internashonal titulá “25 aña di dialógo sosial na Repúblika di Serbia”, organisá pa Ministerio di Labor, Empleo, Asuntunan Sosial i Asuntunan di Veteranonan, bou di liderato di Ministro Nemanja Starović. E evento tabata un espasio pa reflehá e forma kon dialógo sosial struktural ta evolushoná den un konteksto di transformashon sosial, ekónomiko i polítiko.

Representando e presidensia di AICESIS, señor Henriquez a habri e konferensia ku un diskurso fuerte, kaminda el a felisita Serbia pa su kompromiso kontinuo ku dialógo demokratiko i resilensia institushonal. El a para ketu riba e avansenan ku Serbia a logra den dialógo sosial i reformanan laboral, i a enfatisá ku “dialógo no ta un prosedimentu, sino un kultura”—referiondo na e teoríanan komunikativo di demokrasia di e filosófo Jürgen Habermas.

Henriquez a referí tambe na proyektonan resiente na Serbia, inkluindo modernisashon di leinan laboral, lucha kontra trabou infantil i fortifikashon di kapasidat di sindikalismo i di institutonan ku ta representá empresarionan. E logronan aki, segun Henriquez, tin balor stratégiko pa otro demokrasianan ku ta den fase di desaroyo, inkluyendo paisnan di Latinoamérica, África i nos region Karibeño.

Kòrsou lo ta anfitrion di reunion grandi di AICESIS

Durante e seshon, Hunta di Atministrashon a konfirmá ku e próksimo reunionan di Hunta di Direktiva i di e Asamblea General lo tuma lugá na Willemstad, Kòrsou, probabelmente riba 30 i 31 di òktober di e aña aki. Komo pais ku tin e presidensia aktuál di AICESIS, SER di Kòrsou lo tuma e ròl di anfitrion i organisadó ofisial. Preparativonan ya a kuminsá.

E seshonan na Willemstad lo atendé ku dos tema importante: e Konferensia Global konjunto AICESIS–OIT ku lo tuma lugá na Madrid, i e desaroyo di un modelo konseptual pa un índise di kresimentu sostenibel—dos inisiativa emblemátiko den sostenimentu di desaroyo inklusivo i gobernashon partisipativo.

Un bos strategiko pa e region Karibeño

Kòrsou, den su ròl komo anfitrion i lider di AICESIS, ta pone su mes komo un brug diplomátiko entre Europa, Latinoamérika I Karibe. Partisipashon aktivo di paisnan karibeño den e ret internashonal di dialógo sosial, manera AICESIS, ta un oportunidat eksepshonal pa pone temanan vital pa nos region riba agènda mundial—manera hustisia klimátiko, migrashon laboral, empleo informal i inklushon digital. Di e manéra ei, Kòrsou ta kontribuí na un modelo global di gobernashon ku ta mas hustu i inklusivo.

Tokante AICESIS

AICESIS (Asosashon Internashonal di Konsehonan Sosial i Ekónomiko i Institushonnan Similar) ta e organisashon global ku ta reuní mas ku sesenta institushon konsultativo di hopi pais. E organisashon ta traha pa promové desaroyo inklusivo, demokrasia partisipativo i kooperashon multilateral, den kolaborashon serka ku Organisashon Internashonal di Trabou (OIT), Komité Ekonómiko i Sosial di Nashonnan Uní (ECOSOC), Organisashon pa Kooperashon Ekonómiko i Desaroyo (OECD) i e Komité Ekónomiko i Sosial Europeo (CESE).