SER ta risibí promé ehemplar di rapòrt riba seguridat na trabou

Willemstad, 19 di sèptèmber 2024 – Un rapòrt ku ta mustra e magnitut di mal kondukta na boka di trabou i su reperkushonnan ekonómiko a ser entregá djárason 18 di sèptèmber na Konseho Sosial Ekonómiko (SER). E informe, prepará pa Report App den kolaborashon ku About Workplace Harassment (AWH) i Optima Arbodienst, ta tira lus riba e retonan kresiente ku ta sali for di kondukta no deseabel na boka di trabou, i ta pone di forma kontundente su impakto tantu riba merkado laboral komo ekonomia di e isla.

Aunke SER no a tuma un posishon ofisial riba kontenido di e informe ainda, e ta rekonosé e importansia sosioekonómiko di e tema. E konklushonnan ta indiká ku tin un nesesidat urgente pa introdusí reformanan struktural den organisashonnan, adaptá na e dinámika kultural i sosial spesífiko di Kòrsou. Segun e datonan presentá den e informe, 80% di esnan ku a partisipá den e enkuesta a yega di haña nan mes konfrontá ku algun tipo di komportashon no deseabel, manera avansenan seksual òf mikro agreshon, durante nan karera profeshonal. E tipo di insidentenan akí no solamente ta afektá bienestar di empleadonan, sino tambe ta kontribuí na un bahada di produktividat laboral i un oumento den rotashon di personal. Esnan ku no ta sinti nan mes sigur na trabou, ta reportá ku mas probabilidat un alto grado di apsentismo òf ta tuma retiro for di e trabou spesífiko ei. Den un komunidat insular manera Kòrsou, kaminda e lasonan sosial i herarkia ta fuerte, e problema aki hopi biaha ta ser reportá lat òf ni siñalá mes, loke ta hasi e situashon mas difísil.

E informe ta mustra e konsekuensianan grave di inseguridat laboral den sektornan klave manera turismo i kuido, ku ta motornan di ekonomia di e isla. Esnan ku ta traha den turismo ta traha por lo general oranan largu i ta haña nan mes konfrontá ku komportashon no apropiá di bishitantenan. Na otro banda, esnan den sektor di kuido ta inkliná pa sinti nan mes mas vulnerabel pa motibu di eskases di personal i preshon di trabou altu. E kultura lokal di no duna importansia na e problema aki ta stroba esfuersonan pa traha kontra mal komportashon na boka di trabou, ku no ta solamente afektá moral di empleadonan, pero tambe desaroyo ekonómiko di Kòrsou.

E rapòrt, mas aleu, ta suprayá e importansia di yega na solushonnan ku ta adaptá na e konteksto kultural di Kòrsou. E ta rekomendá, entre otro, kreashon di mekanismonan pa denunsiá aktonan no deseabel di forma independiente i aksesibel, i tambe asignashon di asesornan konfidensial ku por ofresé un kanal sigur pa empleadonan por reportá insidentenan. Ademas, e informe ta boga pa implementashon di un kuadro legal mas estrikto pa sigurá ku empresanan i organisashonnan ta obligá pa promové un ambiente laboral sigur i solidario.