SER ta liderá enkuentro regional riba desaroyo sostenibel

Willemstad, 13 di ougùstùs 2024 — Konseho Sosial Ekonómiko (SER) a presidí djamars último e reunion virtual di ‘Consejos Económicos y Sociales e Instituciones Similares’ (CESISALC), e ret regional di konsehonan ekonómiko y sosial i institutonan similar. Durante e reunion aki, a hiba diskushonnan riba varios tópiko di importansia regional, ku atenshon spesial pa promoshon di desaroyo sostenibel i inklusivo den Amérika Latina i Karibe. Un di e puntonan prinsipal riba agènda tabata e posibel integrashon di CESISALC den e Sekretaria-General Ibero-Amerikano (SEGIB), ku ta responsabel pa organisá e kumbrenan Ibero-Amerikano di hefenan di estado i di gobièrnu. E koleganan di e konseho ekonómiko i sosial di Spaña a splika e kondishon- i pasonan nesesario pa integrá e miembronan Ibero-Amerikano di CESISALC den e ret Ibero-Amerikano, i CESISALC mes komo observador. Ta mira e paso aki komo unu pa sigui fomentá koperashon entre e konsehonan sosial-ekonómiko den e región.

Ademas, a diskutí un posibel koperashon ku e Union di Konsehonan Ekonómiko i Sosial di Afrika (UCESA). E koperashon aki ta destiná pa formentá interkambio di mihó prátika i strategia entre Amerika Latina i Afrika. SER di Kòrsou lo selektá un òf mas tema ku ta di importansia pa ambos organismo regional.

Vários pais a presentá e progreso di nan proyektonan sosial-ekonómiko. Argentina (e konseho sosial-ekonómiko di Buenos Aires i esun di e provinsia di Salta), Guatemala, Perú, Repúblika Dominikana i Kòrsou, a kompartí nan eksperensianan i éksitonan, ku énfasis riba temanan manera desaroyo urbano, redukshon di desecho, energia sostenibel, reforma edukashonal, strategia nashonal di desaroyo, i inklushon sosial.

E reunion a finalisá ku e anunsio ku e proksimo reunion di CESISALC ta planifiká pa òktober 2024.