SER ta emití konseho riba proyekto di inisiativa di lei pa ahustá ordenansa di penshun pa funshonarionan públiko

Willemstad, 23 di yüli 2024 – Konseho Sosial Ekonómiko (SER) a emití awe un opinion konsultivo tokante e proposishon di lei di inisiativa pa ahustá e Ordenansa di Penshun di funshonarionan públiko. Presidente di parlamento a presentá e petishon pa un konseho na SER dia 28 di febrüari di e aña akí. E proyekto di inisiativa di lei, di e frakshon di MAN den parlamento, tin komo ophetivo pa eliminá e vínkulo entre indeksashon di penshunnan i ahuste salarial di funshonarionan públiko.

E kambionan proponé tin komo meta mehorá e forsa di kompra di e funshonario hubilá mediante revishon di e régimen aktual di indeksashon kondishonal. Esaki ta pa motibu ku e régimen aktual ta dependé di tantu indeksashon di salarionan komo di e grado di kobertura di e fondo di penshun, ku a kousa situashonnan den kua penshunnan no por a ser indeksá apesar di e posishon finansiero stabil di e Fondo General di Penshun di Kòrsou (APC).

Banda di desvinkulá e indeksashon di penshunnan i salarionan, e proposishon di inisiativa di lei tambe ta inkluí e proposishon pa amendá artíkulo 30, insiso 4, di e Ordenansa di Penshun, ku efekto retroaktivo te na e fecha ku e la drenta na vigor pa medio di P.B. 2015, no. 78. E amienda aki tin komo meta pa eliminá kompletamente e impakto negativo riba penshonadonan.

E konseho di SER ta basá riba un análisis ekstensivo di e konsekuensianan di karakter legal, sosioekonómiko i finansiero di e kambionan proponé. Pa esaki, SER a tené na kuenta, no solamente e situashon finansiero aktual di APC, sino tambe e efektonan premirá riba largo plaso di e normanan nobo di indeksashon.