SER riba proposishon di inisiativa di lei di frakshon di MAN pa baha edat pa haña derechi riba suèldu mínimo pa adulto

WILLEMSTAD, 30 di yanüari 2023 – ,,Saliendo for di e pensamentu ku mester kultivá kapital humano i ku trabou mester ta rendabel, ta bon pa invertí den adultonan hóben. Igualdat di remunerashon pa trabou di rendimentu igual ta forma parti integral di esei pa mantené nivelnan akseptabel di motivashon, moral i étika laboral. Hóbennan independiente, ku ta mayor di edat (18 aña), i ku ta aktivo riba merkado laboral, tin derecho riba a lo ménos un salario inisial ku ta permití nan hiba un bida digno (trabou desente). Na Kòrsou, esaki pa adultonan ta e salario mínimo legal (pa adulto). Por lo tantu, e aktual suèldu mínimo ku legalmente ta asigná pa hendenan hóben (jeugdminimumloon) por ser eliminá pa hóbennan di 18 aña bai ariba.”

Na e konklushon aki Konseho Sosial Ekonómiko (SER) a yega den su konseho pa Parlamento di Kòrsou, ku a keda emití dia 20 di yanüari último, komo reakshon riba e proyekto di inisiativa di lei di frakshon di MAN pa hasi modifikashonnan den e Ordenansa Nashonal di Suèldu Mínimo. E modifikashonnan proponé dor di e frakshon tin di aber ku redukshon di e edat pa risibí suèldu mínimo pa adulto di 21 pa 18 aña.

Riba e tema aki, SER for di 24 di febrüari 2021 (ref.nr. 025/2021-SER) a saka un konseho ekstenso riba un vershon anterior di e proyekto di inisiativa di lei. Ei den SER a yega na e mes un konklushon.

SER ta opservá ku den e hustifikashon di e proyekto di inisiativa di lei modifiká di frakshon di MAN, no ta presentá ningun echo, sirkunstansia i/òf splikashon nobo ku ta duna e órgano konsultivo motibu pa desviá for di su posishon adoptá anteriormente pa loke ta trata e ophetivo prinsipal di redusí e edat pa yega na remarke pa un suèldu mínimo pa adulto, di 21 pa 18 aña. “Aunke, basá riba konvenionan di Organisashon Internashonal di Trabou (ILO) i guianan di Union Europeo (UE), diferensianan di trato riba merkado laboral pa motibu di edat por ta hustifiká bou di sirkunstansianan determiná, ta esensial pa hasi un distinshon entre diferensianan di trato ku ta sirbi ophetivonan legítimo di polítika o maneho di empleo, merkado laboral i di formashon profeshonal, ku diferensianan ku por simplemente ser kategorisá komo diskriminatorio. Pa loke ta trata e kategoria spesífiko di empleadonan di “18 aña”, SER no a haña ningun fundamentu di maneho o argumento hurídiko ku ta hustifiká un diferensia di trato pa e kategoria spesífiko aki den e konteksto di Kòrsou. E órgano di konseho i di konsulta tampoko no a haña o deskubrí ningun hustifikashon konvisente den ámbito di maneho ku ta hustifiká un diferensia di trato di empleadonan den e kategoria “19-20 aña”, ku na Kòrsou pa un gran parti ta traha den sektor di hóreka, hospitality i / òf den retail.

E órgano konsultivo ta konsiderá ademas ku hóbennan di 16 i 17 aña, ku tambe ta aktivo riba merkado laboral, por kobra 75% di e salario mínimo pa adultonan, dor ku por parte nan ta suheto na enseñansa obligatorio i pa insentivá nan pa mas tantu posibel kompletá nan edukashon sekundario. ,,Esaki tambe lo yuda resolvé e problemátika di abandono di skol prematuro (dropout)”, asina ei SER a afirmá.

Klik akí pa e teksto integral di e karta di e konseho di SER. E teksto di e proyekto di inisiativa di lei ku su nota splikatorio ta riba e wèpsait di parlamento . (www.parlamento.cw)