SER ta konsehá riba proposishon pa oumentá suèldu mínimo

WILLEMSTAD, 15 di novèmber 2022 – Konseho Sosial Ekonómiko (SER) a emití awe su konseho na Minister di Desaroyo Sosial, Labor i Bienestar (SOAW) señora mr. Ruthmilda Larmonie-Cecilia riba e proposishon pa un oumento di salario mínimo legal. E konseho aki a ser aprobá den e reunion plenario di SER, ku a tuma lugá djabièrnè 11 di novèmber último.

Dia 12 di sèptèmber 2022 e órgano konsultivo a risibí un petishon di Minister Larmonie-Cecilia pa konsehá riba un konsepto di un dekreto ministerial, ku efektonan general, pa adaptá e montante di salario mínimo pa ora, manera stipulá den artíkulo 9 di e ordenansa nashonal riba suèldu mínimo (P.B.1972, no. 110). Den su petishon e mandatario ta ekspresá su deseo pa (1) ahustá suèldu mínimo bruto pa ora na nivel di supsistensia kalkulá, (2) promové partisipashon laboral di esnan ku no ta trahando i (3) mitigá e efektonan negativo di kaida di poder atkisitivo (forsa di kompra) di e produkto interno bruto (PIB) pa medio di mantenshon di forsa di kompra di un parti di trahadónan di Kòrsou.

Di akuerdo ku e ordenansa nashonal riba suèldu mínimo, promé ku tuma un desishon riba ahuste di suèldu mínimo, SER ta haña oportunidat pa konsehá riba e tópiko aki.