Minister di Finansas ta hiba interkambio ku SER riba implementashon di Pakete di País i Programa di Gobernashon 2022-2025

Willemstad, 18 di mart 2022 – Riba invitashon di Konseho Sosial Ekonómiko (SER), Minister di Finansa sr. Javier Silvania, a reuní djabièrnè 18 di mart 2022 ku vários miembro di SER pa interkambiá punto di bista riba e implementashon di Pakete di País i e Programa di Gobernashon pa e periodo 2022-2025.

Komo minister apuntá pa koordiná implementashon di e reformanan inkluí den e Pakete di País i komo punto di kontakto polítiko i atministrativo pa trabou di e Komishon Nashonal di Reforma, ku na nivel tékniko ta responsabel pa koordiná implementashon di Pakete di País na nòmber di Gobièrnu di Kòrsou, SER a konsiderá deseabel i tambe nesesario tene un interkambio di opinion ku sr. Silvania riba, en partikular, e dimenshonnan sosioekonómiko di e áreanan temátiko ku ta inkluí den e Pakete di País. Konsiderando ku algun tema spesífiko relashoná ku e dimenshon sosioekonómiko aki ta kai bou di responsabilidat ministerial di otro mandatarionan den e gabinete aktual, sr. Silvania a konsehá SER pa tambe tene konsultanan similar ku algun di su otro koleganan.

Teniendo na kuenta e ophetivonan stratégiko, prioridatnan i kondishonnan manera formulá den e Programa di Gobernashon 2022-2025, ku a ser publiká siman pasá, tambe ta inkluí kompromisonan asumí den kuadro di e Pakete di Pais i otro reformanan fundamental, den e reunion ku SER tambe a duna debido atenshon na algun parti di e Programa de Gobernashon, ku spesífikamente ta kai bou di responsabilidat ministerial di sr. Silvania.

E interkambio ku e titular di Finansa a tuma lugá den un ambiente di konfiansa mutuo.

Riba potrèt:           Sr. Silvania mei mei di algun miembro i staf tékniko di SER