Hoge Colleges van Staat i SER ta konsolidá kolaborashon mutuo

WILLEMSTAD, 24 di mei 2018 – Konseho Supremo di Estado, Hoge Colleges van Staat (HCvS) i Konseho Sosial Ekonómiko (SER), representá pa nan respektivo lidernan ofisial, a bini huntu riba djaweps 24 di mei 2018 den e sala di reunion di Algemene Rekenkamer Curaçao na Ansinghstraat pa yega na akuerdonan konkreto riba konsolidashon di nan kolaborashon mutuo.

Sekretario di Algemene Rekenkamer sra. S. Cathalina,  Ombudsman sr. K. Concincion, Sekretario di Raad van Advies sra. C. Raphaëla i Direktor/Sekretario general di SER sr. R. Henriquez a partisipá den un ambiente informal na e reunion. Den e reunion akí a interkambiá di pensamentu riba temanan manera outonomia pa manehá finansa i personal, fortifiká nan posishon independiente den e struktura estatal di Kòrsou i pa huntu organisá programanan di formashon i demas aktividatnan.

E representantenan di HCvS i di SER a yega na un akuerdo pa awor en adelante reuní 4 biaha den un aña basá riba un sistema rotativo pa deliberá riba temanan di interes komun i pa interkambiá di konosementu i eksperensia.

E próksimo reunion lo tuma lugá den ougùstùs di e aña aki.

Riba potrèt e partisipantenan den deliberashon ku otro di man robes bai drechi: sr. R. Trenidad (Bureau Ombudsman), sr. K. Concincion (Ombudsman), sr. R. Henriquez (Sekretario General/Direktor SER), sra. L. Sasso-Hart (Algemene Rekenkamer), sra. S. Cathalina (Sekretario di Algemene Rekenkamer), sra. C. Raphaëla (Sekretario di Raad van Advies), sra. M. Sboui-Racamy (Bureau Secretariaatvoering SER/ROA/GOA) i sra. J. Seedorf (Raad van Advies).