SER ta risibí promé radiografia grandi di inklushon den lugá di trabou

WILLEMSTAD— 6 di mart 2026 — Konseho Sosial Ekonomiko (SER) a risibí ayera un rapòrt independiente ku ta analisá inklushon, diversidat i e sentímentu di pertenensia (“belonging”) den mundu di trabou riba e isla. E estudio, ku a wordu prepará pa Report App B.V. i Optima Arbodienst B.V., ta basá riba un enkuesta online, anónimo i multilengual, ku a wordu yena pa 402 trahadónan di Kòrsou.

Segun e outornan, e resultadonan ta pinta un imágen meskla. Hopi respondente ta indiká ku trato den lugá di trabou ta, por lo general, respetuoso; sinembargo, 18,7% ta bisa ku nan sa skonde informashon personal algun biaha, pa miedu di kon otro lo reakshoná. Ademas, 43,8% ta señalá ku nan ta tende ku frekuensia chiste- i/o komentarionan stereotípiko riba ekspreshon di gènero — un señal ku, segun e informe investigativo, ta un manifestashon subtil di eksklushon i tenshon rònt di diversidat ku ta ser konsiderá normal den sierto entorno profesional.

E investigadonan ta suprayá ku e estudio ta unu deskriptivo i eksploratorio: e ta buska pa pone riba mapa persepshonnan i eksperiensianan, i no tin komo meta pa establesé relashonnan di kousa i efekto.

SER a risibí e rapòrt pa analisá den kuadro di su trabou di konsehá i diálogá riba asuntunan sosioekonómiko. Komo órgano tripartit, ku ta reuní representantenan di dunadonan di trabou, trahadónan i miembronan independiente, SER ta duna konseho na Gobièrnu i Parlamento riba maneho i desaroyo sosioekonómiko.

E konklushonnan di e estudio por sirbi komo punto di salida pa reflekshoná mas i debatí a fondo, den kuadro di diálogo sosial, riba relashonnan laboral i kondishonnan di trabou na Kòrsou.