SER di Kòrsou ta fortalesé na Tesalónika debate global riba transishon hustu i hustisia sosial

WILLEMSTAD, 9 di febrüari 2026.— Konseho Sosial Ekonómiko (SER) di Kòrsou riba 30 di yanüari último di un manera prominente a tuma parti na e reunion statutario di e Konseho di Atministrashon di e Asosiashon Internashonal di Konsehonan Ekonóٕmiko i Sosial i Institushonnan Similar (AICESIS), ku a tuma lugá na Tesalónika, den e region griego di Masedonia. Komo presidente saliente dje ret global aki, SER a yega ku un tim tékniko ku a partisipá aktivamente den e diskushonnan prinsipal ku e presidensia griego a pone pa e periodo 2025–2027: transishon hustu (just transition) i hustisia sosial global (global social justice).

E reunion a tuma lugá den un klima internashonal den kua koöperashon multilaterál ta enfrentando retonan grandi. Volatilidat ekonómiko, rivalidatnan geopolítiko ku ta birando mas fuerte i un grado di fragmentashon persistente ku ta impedí pa enfrentá retonan komun global, i ku ta hasi mas difísil pa konstruí akuerdonan duradero. Den e konteksto ei, AICESIS a pone énfasis riba e balor di un gobernansa mas habrí pa aktornan sosio-ekonómiko — dunadonan di trabou, trahadónan i sosiedat sivíl organisá — pa asina e transishonnan ku komunidat global ta pasando aden aktualmente no bira hiatonan nobo, sino oportunidatnan kompartí.

E agènda ku Gresia ta pushando ta konektá direktamente ku e direkshon ku Kòrsou a defendé durante su mandato na kabes di AICESIS, basá riba un kombinashon di progreso ekonómiko ku resultadonan sosial mas inklusivo. Den e dokumentonan di trabou di e siklo nobo, transishon hustu ta definí komo e paso pa ekonomianan mas sostenibel i digitalisá ku, pa nan por funshoná efikasmente, mester inkorporá for di inisio mekanismonan di diálogonan sosial ku por antisipá riba impakto i ku por protehá gruponan mas eksponente i evitá ku zonannan kompleto ta keda atras.

E seshonnan na Tesalónika a konsentrá nan mes riba asuntunan operashonal i di maneho públiko. Delegashonnan di konsehonan ekonómiko i soshal for di diferente kontinente a diskutí instrumentonan di interkambio di konosementu, fortalesimentu institushonal i formulashon di rekomendashonnan koördiná pa esnan ku ta tuma desishon riba nivel internashonal. Den e diskushonnan, e partisipantenan a sigui enfatisá ku solushonnan global efikas ta posibel solamente ku diálogonan strukturá, konsehonan pa maneho basá riba evidensia i konsenso entre partnernan sosial i diferente otro aktornan.

Representando SER di Kòrsou, un tim tékniko— ku a aktua na nòmber di e presidente den funshon di SER — a hasi un kontribushon importante den yuda konhuntamente desaroyá hèrmèntnan metodológiko ku lo usá den e lunanan benidero. E instrumentonan aki tin komo meta pa kompará di manera sistemátiko eksperensianan nashonal i pa sostené un base komun pa diálogonan internashonal riba maneho. E inisiativa ta den kuadro di e mishon mas grandi di AICESIS, esta fortalesé e fundeshi institushonal di diálogonan sosial riba nivel mundial.

“E reunion aki ta konfirmá ku diálogonan sosial no ta un ideal teóriko, sino un instrumento esensial pa hasi transishonnan global hustu,” asina Raúl Henriquez, direktor i sekretario general di SER di Kòrsou, a enfatisá. “Komo un komunidat chikí, nos ta aportá via AICESIS hèrmèntnan pràktiko ku enfoke riba maneho públiko ku por sirbi no solamente Oropa, sino tambe Áfrika, Asia, Karibe i Latinoamérika. Den un momento ku koöperashon multilateral ta bou di preshon enorme, konferensianan dje índole aki ta demostrá ku progreso real ta nase for di koöperashon, interkambio i akshon kolektivo.”

Banda di e reunion, e partisipantenan a analisá tambe e futuro ròl di AICESIS den espasionan internashonal relevante, manera den Konseho Ekonómiko i Sosial di Nashonnan Uní (ECOSOC) i e Foro Polítiko di Altu Nivel riba Desaroyo Sostenibel, ku e meta pa duna kontribushon mas koördiná riba un agènda di hustisia sosial ku ta konektá ku prioridatnan global i europeo.

Pa SER di Kòrsou, e konferensia aki a fortalesé e idea ku hustisia sosial i maneho di transishonnan no ta solamente un tema akadémiko, sino un kuadro pràktiko pa koöperashon di polítika entre regionnan i kontinentenan: un ophetivo ku tabata sentral den mandato di Kòrsou ora e tabata na kabes di AICESIS.