SER ta konsehá riba proposishon pa prohibí importashon di sierto produktonan fresku di agrikultura

WILLEMSTAD, 15 di desèmber 2025 — Konseho Sosial Ekonómiko (SER) a presentá awe un konseho detayá na minister di Desaroyo Ekónomiko, drs. Roderick Middelhof, tokante un proposishon legal pa prohibí importashon di un kantidat selektá di bèrdura, fruta i yerba fresku. SER a aprobá e konseho aki dia 12 di desèmber último durante un seshon plenario ekstraordinario.

E medida proponé ta pa duna, den sierto sentido, ehekushon na artíkulo 4 di e Ordenansa Nashonal di Importashon i Eksportashon, den un konteksto den kua tin atenshon kresiente pa seguridat alimentario, stabilidat di preisnan di produktonan fresku básiko i pa enforsá e sektor di agrikultura lokal. E proyekto di e dekreto gubernamental, konteniendo medidanan general, ku SER a risibí pa konsehá riba dje, ta pa instituí un prohibishon riba importashon di sierto produktonan fresku – spesífikamente sierto tipo di bèrdura, fruta i yerba fresku –  dor di un sistema di pèrmit i otorgashon di eksonerashon. Segun e proyekto di e dekreto gubernamental, e titular konserní, pa medio di un dekreto ministerial, por determiná i aktualisá periódikamente e lista di produktonan ku ta inkluí den e prohibishon di importashon.

Banda di e prohibishon pa importá, e regulashon proponé ta inkluí un struktura mas amplio pa kolektá informashon, kompilá datonan i registrá produktornan lokal – asina yamá “kunukeronan”. E obhetivo ta pa krea un registro nashonal di kunukeronan pa asina ei atkerí mas informashon detayá ora di otorgamentu di pèrmitnan i, konsekuentemente, pa oumentá transparensia den hinter e kadena di suministro lokal.

Pa formulá su konseho, SER a aserká e problemátika for un perspektiva analítiko, multidisiplinario i rigoroso. Ekspertonan legal den e órgano konsultivo a studia e teksto legal proponé pa wak si e ta aliniá ku e sistema legal internashonal i tambe ku e kuadro legal di Kòrsou, entre otro ku e Ordenansa Nashonal di Importashon i Eksportashon. Tambe a analisá profundamente kon e prohibishon di importashon proponé ta relatá na prinsipio- i normanan den ámbito di komèrsio internashonal. Na mes momentu, SER a analisá e konteksto sosioekonómiko denter di kua e medida proponé lo tin ku surgi efekto. A basa e análisis sosioekonómiko aki riba data disponibel i estudio akadémiko tokante sistemanan alimentario di Kòrsou, enfokando riba dependensia di importashon, konsekuensianan pa preisnan pa konsumidonan i e forma kon e sektor di agrikultura lokal ta strukturá. Sinembargo, e evaluashon no a keda solamente unu teóriko legal i ekonómiko. Tambe a investigá kon e proposishon emití posiblemente lo funshoná den realidat. SER a investigá kon un sistema di pèrmit i eksonerashon ta wòrdu atministrá, ki tipo di supervishon tin i ku adishonalmente lo ta nesesario pa por garantisá komplimentu (compliance) i kon e sistema di rekoudá informashon lo mester ser desaroyá pa hasi e plano kompletu traha efisiente i efektivo.

Pa amplia su perspektiva, SER a inkluí den su análisis eksperenshanan internashonal. For di su análisis komparativo, salí for di literatura i praktikanan regulatorio den otro ekonomianan insular den Karibe, a duna mas profundidat na e konseho, mientras ku tambe a tene konsultanan ku aktornan lokal pa haña un mihó bista riba e konteksto real.

Tur esaki huntu a redundá den un konseho ku ta eksponé e kuadro analítiko i ta evaluá datonan relevante pa konsiderá den práktika. SER ta konvensí ku su konseho amplio lo enforsá e proseso legislativo ku un fundeshi fuerte empíriko i basá riba evidensia ku lo alini’é ku normanan legal i realidat sosioekonómiko di nos pais.