SER ta presentá konseho na Parlamento riba normanan laboral pa sektor di aviashon, marٕítimo i di haf

WILLEMSTAD, 10 di desèmber 2025 — Konseho Sosial Ekonómiko (SER) a entregá awe un konseho formal na Parlamento di Kòrsou riba un proyekto di inisiativa di un ordenansa, entregá pa e frakshon MAN-PIN, pa eliminá e diskrepansia eksistente entre grado di protekshon laboral den sektornan di aviashon, maritímo i di haf, ku e grado di protekshon ku otro empleadonan ta gosa di dje bou di e Areglo Laboral 2000. E obhetivo prinsipal di e inisiativa di e ordenansa aki ta pa tur empleado, ku ta laborá den e sektor aeronáutiko, portuario i marítimo — ku por parte ta ser kubrí pa e areglo menshoná— konta ku e mes un reglanan general di e Areglo Laboral 2000 pa loke ta trata orarionan di trabou, periodo di deskanso, kompensashon pa oranan di trabou èkstra (overtime), trabou riba djadumingú òf riba dianan di fiesta ofisial. Lo mantené un eksepshon pa trabounan realisá riba barkunan òf avionnan estranhero aki na Kòrsou, pa respetá e kuadro teritorial di nos lei.

Den su análisis, SER a evaluá e inisiativa di e ordenansa for di tres perspektiva. Na promé lugá a hasi un komparashon hurídiko, seguidamente a wak e posibel konsekuensianan sosioekonómiko i por último a wak faktibilidat di implementashon di e kambionan proponé. Den su konseho SER ta para ketu na kon por integrá e proposishon den e kuadro laboral legal aktual, kiko konvenionan laboral internashonal relevante ta bisa den e ámbito aki, i kua posibel konsekuenshanan e proposishon lo por tin riba struktura di merkado laboral lokal. Ademas, SER a analisá posibel efektonan práktiko di e proposishon dje inisiativa di lei riba trahadonan, empresanan i outoridatnan lokal — inkluyendo kapasidat aktual di Inspektorado di Labor.