SER ta emití konseho riba proposishon pa ahustá tarifanan di laboratorio médiko

WILLEMSTAD, 26 di novèmber 2025 — Konseho Sosial Ekonómiko (SER) a emití awe su konseho na Minister di Salú, Medio Ambiente i Naturalesa (GMN), Sr. Gilmar Pisas, tokante un proposishon di un dekreto gubernamental, ku ta kontené medidanan general, ku tin komo ophetivo hasi ahustenan den e dekreto gubernamental Seguro Médiko Básiko (BVZ) di 2014 i e dekreto gubernamental Tarifanan Médiko Seguronan Sosial di 2001. E proposishon ta pa aktualisá e lista nashonal pa diagnóstiko di laboratorio médiko i establesé tarifanan máksmo pa kada prestashon ku laboratorionan hasi ku por ser kobrá na Banko di Seguro Sosial (SVB).

E sistema di tarifa di laboratorio aktual ta birando kada bes mas antikuá debí na, entre otro, desaroyonan teknológiko i operativo den e diagnóstiko di laboratorio. E lista aktual a bira práktikamente opsoleto, inkompleto i ta kontené inkonsistensianan interno, ku no ta reflehá práktika diagnóstiko modèrnu. E dekreto gubernamental proponé ta pa aliniá struktura di tarifanan di laboratorio médiko na e último desaroyonan médiko, teknológiko i sosial, miéntras ta buskando tambe pa kontrolá gastunan den e sistema di salubridat públiko.

Den su analisis, SER a wak kon legisladó ta regulá tarifanan den e sektor di salubridat. Na Hulanda, e tribunal College van Beroep voor het bedrijfsleven (CBb) a enfatisá den diferente sentensia ku reguladonan mester duna klaridat kon tarifanan ta ser establesé, kon gastunan real ta ser kalkulá i garantisá ku tarifanan imponé no ta desproporshonal. E hurisprudensia dje tribunal ta pone énfasis riba preparashon atento, rasonamentu transparente i protekshon di derechinan di propiedat segun artíkulo 1 di e Promé Protokòl di e Konvenio Europeo di Derechonan Humano (ECHR).

E konseho di SER ta amplia riba e aspektonan hurídiko, ekonómiko i operashonal dje struktura di tarifa proponé i ta eksaminá posibel implikashon dje ‘sakinan pa laboratorionan médiko, finansiadonan di salubridat públiko, pashèntnan i otro usuarionan di servisionan di laboratorionan médiko na Kòrsou.