Debate bibu riba Inteligensia Artifisial na Kòrsou den kuadro di seshon ‘Future of Work’ di SER

Willemstad, 2 di òktober 2025 — Den un ouditorio yen na Banko Sentral di Kòrsou i Sint Maarten (CBCS), Konseho Sosial-Ekonómiko (SER) a tene su di tres seminario den kuadro di e siklo Future of Work djamars último, 30 di sèptèmber, bou di e título “Living and Growing with AI.”

Na apertura di e evento, minister di Edukashon, Siensia, Kultura i Deporte sr. Sithree van Heydoorn i direktor/sekretario-general di SER, sr. Raúl Henriquez, a manda un mensahe klá: inteligensia artifisial ya no ta u di futuro, sino e tei presente i ta kambiando ekonomia i bida di nos tur. “Tardansa den tuma pasonan signifikante den e ámbito aki, lo kondusí na pèrdida,” asin’ei Henriquez a atvertí, spesialmente pa un isla chikí manera Kòrsou ku mester keda relevante i kompetitivo den un merkado global ku ta kambiando di forma aselerá.

E oradó ku a hasi e apertura ofisial, Sr. minister Van Heydoorn, a pinta un panorama di speransa pero alabes e la manda un señal pa e públiko. Van Heydoorn a urgí pa un esfuerso kolektivo pa fortalesé alfabetisashon digital, alertando ku sin skolnan mas fuerte i un infrastruktura eskolar adekuá, Kòrsou ta riska di hasi e deskrepansia digital, ku aktualmente ta eksistí, mas grandi. Henriquez, na su turno, a insistí riba kuadronan legal, señalando ku transparensia, supervishon humano i regla di lei (‘rule of law’) mester keda sentral den kualke uso di teknologia basá riba inteligensia artifisial.

Despues di e palabranan di introdukshon, a amplia e diskushon ku mas oradó. Sr. Denneth van der Veen, kende ta konsultor di inovashon, a defendé e ponensia ku kompetensia digital por duna Kòrsou i Karibe un bentaha kompetitivo. Sr. Curt Belfor, direktor di e outoridat regulatorio di Kòrsou (RAC), a enfatisá e nesesidat di un maneho sólido i mas transparente pa ku uzo di inteligensia artifisial. Sr. Juan Carlos Goilo, fundadó di Global Minds Network, a hasi un apelashon riba siudadanonan pa tuma un ròl mas aktivo den un mundu ku ta ser dominá mas i mas pa algoritmonan inteligente. Sra. Nicole Wever, kende ta spesialista den desaroyo di kompetensia i di enseñansa, a trese bon kla pa dilanti ku enseñansa, edukashon i lifelong learning ta e invershonnan di mas urgente aworaki pa por sigui edifiká nivel di konosementu i abilidatnan ku ta nesesario pa desaroyo di nos isla.

Na e seshon ‘Mikrófono Habrí’, mas puntonan di bista a bin dilanti. Sra. Nevita Mezas, analista di merkado laboral, a elaborá riba trabou remoto i nomadismo digital, ku ta trese tantu riesgo- komo oportunidatnan. Sra. Elgenie Pieternella, empresaria sosial, a para ketu na vitalidat di ekonomia informal na Kòrsou den e kuadro aki. Sr. Roland Ignacio, èks lider sindikal, a insistí ku labor organisá mester tin su lugá na mesa di inteligensia artifisial pa protehá derechinan laboral i sr. Albert Martes, direktor di servisio meteorológiko i alabes presidente dje Plataforma di Kambio di Klima na Kòrsou, a rekordá ku inteligensia artifisial lo sigui aportá di forma konsiso i mas eksakto kon Kòrsou lo enfrentá retonan medioambiental.

Loke a distinguí e seminario aki for di hopi otro, tabata e formato: hopi interaktivo i na sierto momentu hasta konfrontativo. Preguntanan for di e ouditorio a varia di temor persistente pa mas brain drain te na ki forma inteligensia artifisial por mina privasidat personal òf debilitá trabou den turismo, ku aktualmente ta e sektor ekonómiko mas relevante na Kòrsou. Panelistanan a yega na un konsenso ku ta solamente un koalishon amplio di gobièrnu, sektor empresarial, sindikatonan i sosiedat sivil lo por garantisá ku inteligensia artifisial por ser uzá na un manera resonsabel i hustu.

E oradonan a enfoká riba e echo ku Kòrsou no por atendé e desaroyo aki su so. Referente na kuadronan internashonal, manera e kuadro étiko di UNESCO, a demostrá e nesesidat agudo di aliniá maneho lokal na standartnan global. Hasiendo esaki lo posishoná Kòrsou komo un país chikí pero sufisientemente desaroyá, demostrando asin’ei kurashi den adaptashon di teknologianan modèrnu sin perde aspektonan manera hustisia sosial i sostenibilidat for di bista.

Na final dje seminario, Henriquez a konkluí ku teknologia modèrnu basá riba IA “ta solamente un instrumento; e prueba real ta si hende por adaptá.” “Nos mester aktua kolektivamente — gobièrnu, sektor privá i komunidat en general — pa konstruí un merkado berdaderamente dinámiko den e era aki di inteligensia artifisial,” asina ei Henriquez a enfatisá. “Solamente asina ei Kòrsou lo no ta simplemente biba ku IA, sino e lo sigui krese dor di dje.”