SER ta risibí Fergino Brownbill, Presidente di Parlamento

Willemstad, 19 di sèptèmber 2025 – Presidente di Parlamento, Fergino Brownbill (MFK), a bishitá Konseho Sosial-Ekonómiko (SER) dia 15 di sèptèmber último komo parti di un serie di reunion ku entidatnan importante di Pais Kòrsou. Anteriormente sr. Brownbill a sostené kombersashon ku Kontrolaria General di Kòrsou, Hunta di Konseho, Ombudsman i Konseho Elektoral.

E bishita na SER a konkluí e serie di reunion ku e institutonan ariba menshoná. Na nòmber di Parlamento, sr. Brownbill a suprayá e kompromiso pa fortalesé e koöperashon i promové laso mas estrecho entre Parlamento i institushonnan di pais.

Sr. Brownbill i e delegashon parlamentario a keda risibí pa presidente interino di SER, sr. John Jacobs, i sekretario di e òrgano konsultivo, Sr. Raúl Henriquez. Den e diálogo a papia prinsipalmente tokante di inisiativa di lei di Parlamento ku ta keda mandá pa SER pa konseho i rekomendashon, ku énfasis riba maneranan pa mehorá e efektividat i efisiensia di e proseso legislativo.

E reunion a enfatisá e importansia di un koöperashon konstruktivo entre Parlamento i SER pa duna un impulso n’e agenda legislativo di Kòrsou di un manera transparante.