SER ta emití konseho na parlamento riba kompesashon pa stazjèrnan; pero mester evitá ‘lei órfano’

WILLEMSTAD, 29 di yûli 2025 – Konseho Sosial Ekonómiko (SER) a emití su konseho awe, djamars 29 di yǔli 2025, riba petishon di Parlamento, enkuanto un proposishon di inisiativa di lei nobo ku ta regulá pago di un kompensashon finansiero ‘hustu’ na tur studiante ku ta kore stazje profeshonal na empresanan o entidatnan na Kòrsou. E òutor i inisiadó di e proyekto di inisiativa di lei aki, Sr. Gwendell Mercelina Jr. (Partido Nashonal di Pueblo, PNP), entre tantu, no ta miembro mas di Parlamento despues di e elekshonnan na mart último. Esaki ke men ku e proposishon legislativo por keda sin un representante den Staten pa defendé durante debate i votashon – un situashon ku por resultá den un sorto di ‘lei órfano’.

Pa ilustrá un posibel solushon, SER ta rekomendá pa sigui e ehèmpel di Ulanda kaminda Parlamento (Tweede Kamer) tin mekanismonan prosedural bon definí si kasonan spesífiko asina aki presentá nan mes. Einan un otro miembro o mas otro miembro di Parlamento lo por disidí di tuma e proposishon over pa asina ei evitá posibel ekspirashon di e proyekto di inisiativa di lei, kombirtiendo e den un lei ‘órfano’. SER ta di opinion ku, for di un punto di bista di transparensia, efisiensia i efektividat di e proseso legislativo, esaki no ta rekomendabel.

Banda di konsiderashonnan prosedural, SER ta enfatisá den su konseho ku e obligashon pa kompensashon di stazjèrnan ta un paso importante pa logra igualdat di oportunidat pa tur hóbèn. Den práktika ta resultá ku stazjèrnan mes tin ku kubri nan gastu di transporte, kuminda i otro kos, pasobra hopi lugá di trabou no ta duna ningun tipo di pago òf otro tipo di kompensashon durante e periodo ku nan ta atkiriendo eksperensia di trabou. Segun SER, esaki ta pone, spesialmente, studiantenan di menos rekurso finansiero den un situashon desbentahoso kompará ku nan koleganan di famianan mas pudiente. Un kompensashon básiko i fiho pa tur stazjèr lo evitá ku ta solamente esnan ku por kontá ku sosten finansiero for di kas por logra haña eksperensia profeshonal sin kompensashon. SER ta di opinion ku un lei pa introdusí pago pa kore stazje lo yuda eliminá e desigualdat sosial aktual aki i tambe mehorá posibilidat pa studiantenan di tur kategoria sosial haňa eksperensia ku lo benefisiá nan den futuro pa nan haña akseso na merkado laboral.

E konseho di SER lo ser konsiderá den deliberashonnan parlamentario ku posiblemente lo kontinuá den e siguiente fase legislativo.