“Sin seguridat sosial, no tin libertat berdadero”

Bussum, 20 di yüni 2025 — Djaweps 19 di yüni último, drs. Raúl Henriquez, Direktor i Sekretario General di Konseho Sosial Ekonómiko (SER) di Kòrsou, a hiba un diskurso influyente dilanti di mas ku 900 asesor konfidenshal sertifiká, ehekutivonan i profesionalnan den integridat i seguridat sikososial, durante e kongreso anual di e Asosiashon Nashonal Hulandes di Asesornan Konfidenshal (Landelijke Vereniging van Vertrouwenspersonen (LVV)), ku a tuma lugá na e sentro di konvenshon Aalt na Bussum, Hulanda.

Riba invitashon dje presidente di LVV, señora Ingrid te Brake, Henriquez a asentuá e importansia di e ròl di asesor konfidenshal: “E asesor konfidenshal no ta solamente akapará kehonan di forma pasivo, sino e ta un defensor aktivo di dignidat humano, hustisia institushonal i —ku no tin duda algun— e núkleo di legitimidat di organisashonnan tantu públiko komo privá.” El a ekstendé palabranan di elogio pa ku e tema dje kongreso titulá —“E asesor konfidenshal den moveshon: rumbo pa pro-aktividat”— komo muestra di un vishon stratégiko.

Henriquez a indiká ku e reto aki ta surpasá fronteranan geográfiko. “Na Kòrsou —i tambe, mutatis mutandis, na Aruba, Sint Maarten i entidatnan públiko di Karibe Hulandes— ta nota e mesun patronchi manera den otro partinan di Reino Hulandes: vulnerabilidat sistémiko, silensio, kultura di miedu, preshon di lealtat informal i falta di struktura sigur i fásil pa por raportá hostigashon i komportashon no-deseá.” E la duna di konosé ku den komunidatnan chikí, proksimidat sosial por eliminá e deseo di papia abiertamente, ku ta hasi e ròl i funshon di un asesor konfidenshal mas importante ku nunka.

Enfatisando seguridat sosial komo un pilar importante dje kontrato sosial, Henriquez a suprayá: “E derechi riba un ambiente di trabou sigur, respetuoso i íntegro no ta un deklarashon boluntario, sino un normá legal, basá riba akuerdonan internashonal manera Konvenio No. 190 di Organisashon Internashonal di Trabou (ILO) i e deklarashon tripartit tokante empresanan multinashonal i maneho sosial.”

El a remarká ku e buki Stop the Silence, ku anteriormente a keda entrodusí na SER di Kòrsou, i esun ku ta sig’i’é titulá The Proactive Confidential Advisor, ta kontené señalnan di un kambio kultural grandi ku ta na kaminda. “E obranan aki ta muestra di konvershon di un aktitut pasivo pa un liderasgo étiko preventivo. Prevenshon ta institushonalmente primordial i ta pidi invershon struktural den alsá konosementu, desaroyá normanan i di nesesidat urgente di un sertifikashon profeshonal,” Henriquez a remarká. E la suprayá ku asesornan konfidenshal konhuntamente mester posishoná nan mes di forma stratégiko den kumplimentu ku normanan i pa nan no ta solamente un apèndiks di maneho di rekurso humano.

Pa bolbe na e impakto pa sosiedat en general, Henriquez a urgí e oudiensia pa akshon konhunto: “No mester limitá e tema importante aki na solamente desaroyo i formulashon di maneho preventivo, sino konvertí e tema aki den unu ku ta étikamente sostenibel basá riba normanan sosial nobo. Huntu, nos mester traha pa logra un kuadro legal i balornan intrarregional ku ta fortalesé e trabou esensial di asesornan konfidenshal di un forma sostenibel.” Henriquez a finalisá su diskurso ku palabranan ku a resoná profundamente “Sin seguridat sosial, no tin libertat real”

E kongreso anual di LVV na Hulanda a inkluí seshonnan plenario, oradonan di taya, tayernan práktiko i un diskushon di pènel den kua a interkambiá riba e nesesidat di konfiansa den relashonnan laboral.