SER di Kòrsou ta firma un akuerdo internashonal di kooperashon na Bruselas

Bruselas/Willemstad, 29 di mart 2025 — Djamars 25 di mart último, Konseho Sosial Ekonómiko (SER) di Kòrsou, den su kalidat komo presidente di e Asosiashon Internashonal di Konsehonan Ekonómiko i Sosial i Institushonnan Similar (AICESIS), a firma un akuerdo di koperashon ku Komité Ekonómiko i Sosial di Union Europeo (CESE). E akto di firmamentu a tuma lugá na Bruselas i su ophetivo ta establesé un koperashon struktural entre e dos organonan konsultivo di sosiedat sivil na nivel mundial.

E akuerdo aki ta un paso importante pa uni esfuersonan entre Europa i otro regiónnan pa stimulá partisipashon sosio-ekonómiko, desaroyo sostenibel i koordinashon di maneho públiko na nivel mundial. E dokumentu ta firmá pa Señor Oliver Röpke, presidente di CESE, i Señor John Jacobs, presidente di AICESIS.

Kooperashon riba nivel internashonal

E akuerdo ta establesé un base di kooperashon ku ofisialmente no ta obligatorio, pa enfrentá retonan global manera kambio di klima, migrashon, salú públiko, desaroyo teknológiko i fortifikashon di gobernashon demokrátiko i partisipatorio. AICESIS i CESE ta komprometé pa intensifiká interkambio di informashon, partisipá den aktividatnan komun i duna kontribushon konhunto den fóronan internashonal. “E kooperashon aki ta fortifiká e ròl di sosiedat sivil komo un brùg entre komunidat i esnan enkargá ku toma di desishonnan públiko. Ademas e ta asentua e importansia global di nos institushonnan”, asina Señor Raúl Henriquez, direktor i sekretario general di SER di Kòrsou, a deklará. “Ta un honor pa Kòrsou por kontribuí na nòmber di AICESIS den konkretisashon di diálogo global i partisipashon di siudadanía”.

Sin kompromiso finansiero adishonal

E kooperashon no ta impliká ningun gastu èkstra. Tur dos entidat lo kubri nan mes gastunan den kuadro di nan medionan finansiero i presupuestario. E akuerdo a drenta na vigor riba mes dia di firmamentu i ta terminá ora kualke un di e partidonan notifika tres luna adelanta.
Ku e akuerdo aki, AICESIS i CESE ta reafirmá nan kompromiso komun pa un órden mundial mas hustu, inklusivo i sostenibel, den kua partisipashon di siudadanonan ta un pilar fundamental.