AICESIS i ILO ta firma akuerdo renobá bou di liderasgo di SER di Kòrsou

BRUSELA / GINEBRA, 28 di mart 2025 — Bou di liderasgo aktual di Konseho Ekónomiko i Sosial  (SER) di Kòrsou, e Asosiashon Internashonal di Konsehonan Ekónomiko i Sosial i Institushonnan Similar (AICESIS) i Organisashon Internashonal di Labor (ILO) a renobá nan akuerdo di kolaborashon. E akuerdo nobo, firmá djaweps 26 di mart último despues di negoshashonnan intensivo, ta dura te ku aña 2031 i ta reforsá nan kompromiso pa promové trabou digno, hustisia sosial i desaroyo inklusivo den institushonnan ku ta representá sosiedat sivil.

AICESIS i ILO ta trahando huntu for di aña 2000, promoviendo dialógo sosial, gobernashon demokrátiko i un merkado laboral sostenibel i resiliente. “Awe nos ta reafirmá nos kompromiso ku lei i demokrasia den esfera di trabou i mas ayá,” asina sra. Manuela Tomei, Direktora Athunto di ILO, a trese dilanti durante e akto di firmamentu di e akuerdo renobá. “Den un mundu kaminda boluntat di hende pa skucha otro ta un reto, dialógo sosial ta mas importante ku nunka. Ku investigashon, kapasitashon i trayektonan konhunto, nos ke drecha konfiansa den institushonnan i garantisá trabou digno.”

Durante e periodo tras di lomba tabata tin hopi konferensia i seminario internashonal ku e dos entidatnan a organisá konhuntamente. Na 2023 nan a adoptá e, asina yamá, Deklarashon di Atenas, tokante e papel importante ku e di institushonnan aki ta hunga den lucha kontra desigualdat laboral.

Presidente di AICESIS, sr. John Jacobs, a mustra riba importansia di e akuerdo renobá aki: “E akuerdo aki ta un promesa na pueblo. Den tempu di insertidumbre na nivel global, nos ta sigui boga pa balornan manera trabou digno, hustisia sosial i desaroyo inklusivo. Nos ta bisa tur hende: nos ta tende boso, i nos ta akshoná huntu ku boso i pa boso.”

E siguiente Konferensia Global AICESIS–ILO lo tuma lugá den desèmber 2025 na Madrid, Spaña, bou di organisashon di e konseho sosial i ekónomiko di e pais ei.
Ku e renovashon aki, AICESIS i ILO ta pone nan mes firmemente dilanti di un movementu mundial pa hustisia sosial — ku SER di Kòrsou na kabes di e proseso te ku òktober di e aña aki.