SER ta duna konseho riba reforma fiskal 2025

Willemstad, 20 di mart 2025 – Konseho Sosial-Ekónomiko (SER) a emití awe un informe tokante e reforma fiskal ku ta planiá pa implementashon durante e aña aki.
E reforma ta enfoká riba modernisashon di e sistema fiskal di e isla, pa asina e por ta ahustá na e realidatnan ekónomiko i sosial aktual.
E konseho ta basá riba un petishon urgente di Miníster di Finansas i e dokumento a ser elaborá ku aporte amplio di ekspertonan fiskal eksterno i partnernan sosial.
Nan kontribushon a duna un bista klá, basá riba prátika, ku rekomendashonnan konkreto i fundamental.
E reforma planteá ta kontené kambionan importante den, entre otro, impuesto di entrada, impuesto di ganashi, impuesto di suèldo i impuesto di benta.
E ophetivo prinsipal di e reformanan aki ta pa kontrarestá evashon fiskal, mehorá e klima di invershon i amplia e base fiskal di Kòrsou pa sostené desaroyo ekónomiko i sosial duradero.