WILLEMSTAD, 18 di desèmber 2024 — Konseho Sosial Ekonómiko (SER) a emití su opinion konsultivo tokante e proposishon pa oumentá suèldu mínimo legal. E proposishon ku lo drenta na vigor 1 di yanüari 2025, ta inkluí un oumento di 3,9%, subiendo e salario mínimo pa ora di NAf 11,28 pa NAf 11,72.

E ahuste proponé ta basá riba datonan di inflashon di ougùstùs 2024, kalkulá pa Ofisina Sentral di Statistik (CBS). Segun gobièrnu, e ophetivo prinsipal ta pa protehá poder atkisitivo di empleadonan ku ta gana salario mínimo kontra kosto di bida elevá.

Segun artíkulo 13, insiso 1, di e Ordenansa Nashonal pa Salario Mínimo (P.B. 2022, no. 135), ta obligatorio pa konsulta SER anualmente promé ku determiná nivel di suèldu mínimo. E opinion a ser prepará riba petishon di Minister di Desaroyo Sosial, Labor i Bienestar (SOAW) i a ser finalisá durante un seshon ekstraordinario di SER djamars 17 di desèmber último. Si e proposishon wòrdu implementá, ta spera ku e ahuste lo resultá den un subida di NAf 76,21 di suèldu mínimo mensual pa 2025.

Indeksashon anual di salario mínimo ta ser mirá komo un hèrmènt pa promové stabilidat ekonómiko i hustisia sosial na Kòrsou.