Kresementu inklusivo komo solushon pa krísis migratorio i demográfiko

Willemstad, 10 di desèmber 2024 – Na un konferensia internashonal importante ku a tuma lugá na Athenas, Gresia, dia 2 i 3 di desèmber último, Konseho Sosial Ekonómiko (SER) di Kòrsou a hasi un yamada fuerte pa promové un kresementu inklusivo komo solushon pa e krísis migratorio i demográfiko mundial. Representando AICESIS, e asosiashon internashonal di konsehonan ekonómiko i sosial i institushonnan similar, ku aktualmente ta ser presidí pa SER di Kòrsou, Direktor i Sekretario General Raúl Henriquez a enfatisá e nesesidat urgente di kolaborashon: “E desafio di kambio demográfiko i fluho migratorio ta pidi un responsabilidat kompartí, tantu lokalmente komo globalmente.”

E konferensia, organisá pa e Konseho Ekonómiko i Sosial di Gresia (OKE), a reuní representantenan di mas ku 30 pais na e históriko Museo di Akropolis, un lugá emblemátiko ku ta simbolisá balornan demokrátiko i akshon kolektivo. Durante dos dia, partisipantenan a diskutí strategianan pa enfrentá e desbalanse demográfiko, preshon migratorio i desafionan di merkado laboral.

E evento a kulminá ku un deklarashon konhunto ku ta promové pasonan konkreto pa enfrentá e retonan aki. Den su diskurso na e seshon, Henriquez a enfatisá e urgensia pa bai mas aya di palabra: “Awor ta ora pa transformá ideanan den akshonnan konkreto. Kresementu inklusivo no ta un aspirashon, sino un nesesidat”, asina ei e la suprayá.

E deklarashon final ta promové un enfoke balansá ku ta inkluí invershon den edukashon i servisionan sosial, integrashon mas efektivo di migrantenan i un distribushon mas hustu di rekursonan entre regionnan mas desaroyá i ménos desaroyá. Ademas, ta suprayá e ròl transformadó di digitalisashon i adaptashon klimátiko pa rekonfigurá merkado laboral i garantisá su resilensia pa futuro.

Henriquez a enfatisá e papel úniko di konsehonan ekonómiko i sosial pa konektá diseñonan di maneho ku implementashon práktiko: “E deklarashon aki ta demostrá e poder di kolaborashon i loke por logra ora ku diferente interesnan ta traha huntu pa e bien komun.” Komo presidente di AICESIS, SER di Kòrsou ta reafirmá su kompromiso i ta boga pa implementashon di e rekomendashonnan den e deklarashon, ku un enfoke fuerte riba redukshon di desigualdatnan i fortalesementu di koheshon sosial.

E yamada di SER pa kresementu inklusivo na Athenas ta basá riba su eksperensia di liderazgo den asuntunan migratorio. Na 2019, SER di Kòrsou a organisá na Kòrsou un simposio titulá “Migrashon i Desaroyo Sosioekonómiko: Desafionan i Opshonnan pa Maneho” den estrecho kolaborashon ku konsehonan sosial ekonómiko di Aruba i Sint Maarten. E evento aki a reuní polítikonan, akadémikonan i ekspertonan internashonal pa analisá e impakto di migrashon den Karibe i desaroyá strategianan pa un maneho efektivo. E ideanan i rekomendashon ku a sali for di e simposio aki a forma e base pa e papel di liderazgo ku SER tin aktualmente den diskushonnan global riba migrashon.

Bou di liderazgo di SER di Kòrsou, AICESIS a amplia e esfuersonan pa konektá kresementu ekonómiko ku hustisia sosial i solidaridat. E mensahe di Henriquez for di Athenas ta resoná ku un meta global kompartí: transformá diálogo den progreso signifikante. Henriquez a konkluí: “Nos futuro kolektivo ta dependé di maneho inklusivo i kurashi pa por atendé di forma responsabel ku e desafionan urgente aktual, garantisando ku ningun hende o komunidat no ta keda atras.”