“Gobernashon inklusivo no ta un opshon, sino un nesesidat”

Willemstad/Rio di Janeiro, 22 di novèmber 2024 – Rio di Janeiro a bira esenario di un yamada fuerte pa inklushon durante e Kumbre Sosial di G20, ku a tuma lugá riba 15 i 16 di novèmber último. E Asosiashon Internashonal di Konsehonan Ekonómiko i Sosial i Institushon Similar (AICESIS), bou di e presidensia aktual di e Konseho Ekonómiko i Sosial (SER) di Kòrsou, a promové reformanan ku ta pone partisipashon di sosiedat sivil na sentro di desishonnan global.

“Gobernashon inklusivo no ta simplemente un opshon; e ta e base fundamental pa polítika hustu i efektivo,” segun e delegashon di AICESIS, ku a konsistí di Apostolos Xyrafis, sekretario general di AICESIS, i Raúl Henriquez, direktor i sekretario general di SER di Kòrsou. Dilanti di un sala yen di lidernan polítiko i representante di e sosiedat sivil, nan a yama atenshon riba e echo ku sin partisipashon amplio, solushonnan sostenibel no por bira realidat.

Durante e pènel titulá “Konsehonan Ekonómiko i Sosial i e Inklushon di Sosiedat Sivil den Gobernashon Global”, Henriquez a presentá e Roadmap pa Kresementu Amplio i Inklusivo, un plan pa balansá progreso ekonómiko ku igualdat sosial. “E 1% di hende mas riku ta kontrolá serka di 40% di e rikesa mundial, miéntras miónes di hende ta luchá diariamente pa sobrebibí. Un reforma profundo di gobernashon global ta nesesario urgente,” segun Henriquez.

AICESIS a enfatisá tambe ku metanan SMART – spesífiko, na midí, realístiko i limitá den tempu – ta nesesario pa garantisá resultadonan transparente i efektivo. “Maneho inklusivo no ta trata solamente di kresementu ekonómiko. E ta akapará tambe oportunidat igual, redistribushon di rikesa, i protekshon di rekursonan natural pa futuro generashonnan.”

E mensahe di AICESIS a haña respaldo den e deklarashon final di e Kumbre di G20. Pa promé biaha, lidernan mundial a rekonosé eksplísitamente e ròl fundamental di sosiedat sivil den gobernashon global. “Nos ta agradesí e método  inovador di e presidensia Brasileño pa integrá mihó gruponan di interes,” e deklarashon final ta bisa. “E plan akí ta pone enfoke riba e ròl konstruktivo ku komunidat sivil por i mester tin pa abordá retonan ekonómiko, finansiero, polítiko, medioambiental i sosial. Nos ta selebrá e desishon pa organisá un Kumbre Sosial di G20, ku a duna e aktornan no-gubernamental un plataforma úniko pa kompartí nan perspektiva riba tema esensial den e agènda internashonal.”

AICESIS ta klasifiká e rekonosementu aki komo un paso krusial pa logra un gobernashon mas hustu i transparente. “Esaki ta konfirmá ku partisipashon di komunidat sivil no ta solamente un gesto simbóliko, sino un pilar esensial pa desishonnan hustu,” segun e delegashon.

Na final, AICESIS a hasi un yamada na gobièrnunan, komunidat sivil i sektor privá pa traha huntu pa un kambio sostenibel. “E deklarashon di G20 ta un paso den e direkshon korekto, pero progreso real ta eksigí un kompromiso kolektivo kontinuo,” Henriquez a enfatisá. “Solamente ku kolaborashon nos por transformá gobernashon global den un sistema hustu, inklusivo i sostenibel.”
Tokante AICESIS

AICESIS ta un asosiashon global di konsehonan ekonómiko i sosial ku ta konsistí di mas ku 70 pais. E organisashon ta promové gobernashon partisipativo i maneho ku ta pone énfasis riba igualdat i sostenibilidat. For di novèmber 2023, SER di Kòrsou tin e presidensia di AICESIS pa un periodo di dos aña.