CESISALC ta buska solushonnan

Willemstad, 24 òktober 2024 – Kasi 60 porshento di trahadónan den Latinoamérika i Karibe ta laborá den ekonomia informal, kaminda nan no tin akseso na protekshon sosial òf derechonan laboral. Alabes, rònt di 25 porshento di e poblashon ta biba den pobresa, i solamente 53 porshento tin akseso na Internet, ku desigualdat grandi entre zonanan urbano i rural.

E asuntunan preokupante aki tabata e temanan sentral durante un enkuentro virtual ku a tuma lugá  djamars 22 di òktober último, organisá pa CESISALC, e ret di konsehonan sosioekonómiko di region. Bou di e liderazgo di e Konseho Sosial Ekonómiko (SER) di Kòrsou, e enkuentro a konta ku representantenan di paisnan manera Argentina, Guatemala, Honduras, Perú i Repúblika Dominikana, entre otro.

Durante e enkuentro, a diskutí posibel reformanan importante ku por redusí ekonomia informal i duna mihó protekshon na gruponan vulnerabel. E diskushonnan tabata konsentrá riba, entre otro, fortalesé e sistema di seguridat sosial pa hende muhé, hóbennan, e komunidat LGBTQ, i pueblonan indígena. Un representante di e Konseho Nashonal di Trabou i Promoshon di Empleo (CNTPE) di Perú a enfatisá importansia di un diálogo strukturá entre partnernan sosial. E representante di CNTPE a atvertí ku “Sin koöperashon, esnan mas vulnerabel lo keda invisibel”.

Tambe e transformashon digital, ku ta tumando lugá di forma aselerá den nos region, tabata punto di enfoke durante e interkambio virtual. Reunionnan previo di CESISALC ya a pone debido atenshon na tantu e oportunidatnan komo e riesgonan di Inteligensia Artifisial (AI). “Avansenan teknológiko por stimulá kresementu ekonómiko, pero sin un regulashon adekuá, eksklushon lo keda un peliger real,” segun e partisipantenan.

Na e enkuentro aki tambe a papia riba ekspanshon di e ret CESISALC. Resientemente, e órgano asesor sosioekonómiko di e provinsia di Salta di Argentina a bira miembro nobo, i SER di Kòrsou ta hibando kombersashonnan ku miembronan nobo potensial di Méhiko i Chile. E ekspanshon aki ta ku mira pa sigui fortalesé e ret i avansenan sosioekonómiko den region.

CESISALC lo tene su próksimo enkuentro, e biaha aki den un forma físiko, na luna di febrüari 2025 na La Antigua, Guatemala, kaminda e partisipantenan lo evaluá progreso di e proyekto- i programanan ku ta keda na marcha. For di sèptèmber 2023, SER di Kòrsou ta presidí e ret regional aki.