SER representá na Foro Polítiko di Nivel Haltu di Nashonnan Uní

Willemstad, 23 di yüli 2024 – Konseho Sosial Ekonómiko (SER) di Kòrsou a partisipá na e Foro Polítiko di Nivel Haltu (HLPF) di e Konseho Ekonómiko i Sosial di Nashonnan Uní (ECOSOC) di 15 te ku 18 di yüli último. E foro akí a kuminsá un siman anterior na e sede di Nashonnan Uní na New York. Den su kalidat komo presidente di e Asosashon Internashonal di Konsehonan Ekonómiko i Sosial i Institushon Similar (AICESIS), SER di Kòrsou tabata presente na e evento aki.

E HLPF 2024 tabata konsentrá riba “Fortifiká e Agènda 2030 i eliminá pobresa den tempu di vários krísis: e entrega efektivo di solushonnan sostenibel, resistente i inovativo”. Durante e foro, a hasi evaluashon temátiko di e Ophetivonan di Desaroyo Sostenibel (ODS) 1 (Eradiká pobresa), 2 (Nò na Hamber), 13 (Akshon Klimátiko), 16 (Pas, Hustisia i Institushonnan Fuerte) i 17 (Aliansa pa Lográ e Ophetivonan).

Durante e foro, AICESIS a enfatisá e nesesidat di metanan mas spesífiko i medibel pa kada ODS. Apesar di e bon intenshon di hopi paisnan, progreso den e ámbito aki ta kana lento, debí na faktornan manera e pandemia di COVID-19, falta di rekursonan finansiero, konfliktonan armá, kambio klimátiko i desasternan natural. Solamente 17% di e ophetivonan di desaroyo sostenibel te ainda por ser alkansá na 2030.

AICESIS tambe a pone dilanti e importansia di e resultado di e kumbre di ODS’nan di 2023, ku a yamá pa un invershon anual di $500 bion di dòler merikano pa paisnan desaroyá pa yena e falta di finansa.  A hasi un yamada fuerte pa un koöperashon multilateral mas fuerte i pa partisipashon di tur stakeholder, inkluso organisashonnan ku ta representá sosiedat sivil i hóbennan.

Un plan di akshon konkreto ta nesesario, inkluso metanan mas spesífiko i medibel pa kada ODS, i mekanismonan pa monitoriá progreso i duna kuenta i rason. Un aliansa stratégiko entre gobièrnu, sektor privá i organisashonnan di sosiedat sivil ta nesesario, pa interkambiá konosementu i bon práktikanan entre paisnan. Mobilisashon di rekursonan pa apoyá paisnan den desaroyo ta esensial.

AICESIS tabata representá na e HLPF pa e presidensia di Kòrsou, e sekretario general di AICESIS i e representante permanente di AICESIS na ECOSOC.
Pa e rsultadonan klek akí
Pa e vershon franses klek akí