Sistema di Garantia di Depósito spliká detayá den SER

Willemstad, 20 di yüni 2023 – Riba invitashon di Konseho Sosial Ekonómiko (SER), Minister di Finansa mr. drs. J. Silvania, djabièrnè dia 16 di yüni último, a duna un splikashon detayá di su proposishon ku e la someté na SER pa konsulta i konseho riba e proyekto di e dekreto gubernamental, konteniendo medidanan general, pa apliká artíkulo 39 di e ordenansa nashonal ku ta supervisá e sistema bankario i di krédito di e union monetario di Kòrsou i Sint Maarten. E proyekto di e dekreto ku a bai SER tambe ta konosí komo ‘sistema di garantia di depósito’ (depositogarantiestelsel).

Ophetivo prinsipal di e proyekto di e dekreto gubernamental menshoná ta pa kompensá tur titular di kuenta i spardónan den kaso ku un entidat di krédito no por kumpli mas ku su obligashonnan finansiero. E obligashonnan aki ta referí spesífikamente na kréditonan, prosedente di depósitonan hasi, manera deskribí den artíkulo 39 di e ordenansa nashonal ku ta supervisá e sistema bankario i di krédito. Artíkulo 39 ta stipulá ku Banko Sentral di Kòrsou i Sint Maarten (CBCS) ta konsultá ku e organisashonnan representativo en kuantu introdukshon di garantia riba reklamonan di titularnan di kuenta i spardónan. E garantia ta aplikabel te na un montante máksimo determiná i ta konta pa entidatnan di krédito registrá, ku no ta entidatnan di krédito internashonal. Manera indiká, e ophetivo ta pa protehá titularnan di kuenta bankario kontra posibel riesgo dado kaso e entidat bankario i o di krédito no por kumpli ku su obligashonnan pa ku nan.

E obligashonnan aki ta konsistí di garantisá e kréditonan. Konsekuentemente, kréditonan ku mester keda garantisá, e tipo di titularnan di kuenta i e montante máksimo ku mester keda garantisá ta ser determiná pa medio di dekreto gubernamental, konteniendo medidanan general. Si CBCS no yega na un akuerdo durante e konsultanan ku entidatnan representativo den mundu bankario i di krédito, artíkulo 39 di e ordenansa nashonal ku ta supervisá e sistema bankario i di krédito ta otorgá e titular di finansa e obligashon di introdusí normanan.

E proyekto di e dekreto gubernamental, ku aktualmente ta na SER, ta proveé e normanan aki pa tur entidat di krédito registrá, ku eksepshon di e entidatnan di krédito internashonal.

Konsiderando e implikashonnan sosioekonómiko di e proyekto di e dekreto gubernamental aki, a disidí di pidi un opinion di SER.

E splikashon di Minister di Finansa sr. Silvania i e interkambio ku a sigui ku SER a bai di un manera konstruktivo.