Kòrsou pais anfitrion di reunion di direktiva AICESIS na 2019

Willemstad, 19 di sèptèmber 2018 – Kuminsamentu di mart 2019 Kòrsou lo fungi komo pais anfitrion pa e próksimo reunion di direktiva di AICESIS, e organisashon internashonal di e Konsehonan Sosial Ekonómiko i institutonan similar. Representantenan di diesocho pais for di kuater kontinente lo deliberá hunto tokante e tema sentral ’impakto di revolushon digital riba futuro di humanidat’ (The impact of the digital revolution on the future of humanity) i tokante e programa di mas aña di e órgano internashonal. Tambe representantenan di e organisashon internashonal di labor, ILO, i e  Economic and Social Council (ECOSOC) di Nashonnan Uní (NU) ta bai ta presente komo opservadó den e reunion.

Esakí ta un di e resultadonan di e reunion general di AICESIS ku a tuma lugá 17 i 18 di sèptèmber último na e SER nashonal di Fransia (CESE) na Paris. E delegashon ofisial di SER Kòrsou, konsistiendo di e direktor/sekretario general Raùl Henriquez i konsehero prinsipal Miloushka Sboui-Racamy, a partisipá komo miembro di AICESIS, miembro di direktiva i tambe komo Sekretario general suplente di AICESIS pa e región Latinoamérika i Karibe.

Riba petishon di presidente di AICESIS – i Sektretario general di AICESIS e delegado di SER Kòrsou, den e último funshon akí, a duna un presentashon tokante funshonamentu di e konsehonan konsultativo sosioekonómiko di region, e manera ku nan ta aportá na progreso di diálogo sosial i e diskushon sosial ku nan ta inisiá relashoná ku e tema ‘konsekuensia di e revolushon digital’. Durante e presentashon, basá riba un estudio ku SER Kòrsou a hasi den region, a sigui deliberá riba e límitashonnan konstatá (Konsehonan ku no ta aktivo) i e desavionan di den region ku ta stroba funshonamentu di algun konsehonan di konsulta, manera instabilidat polítiko i falta di fondo. Tantu e investigashon komo e presentashon a kai den bon tera i por sirbi komo ehèmpel pa resto di e region.

Vários region tin representashon den e direktiva aktual di AICESIS. E direktiva aktual ta konsistí di e Konsehonan sosial-ekonómiko di Benin, Kosta Marfil, Guinea, Marokko, Senegal, Mali, Brasil, Kòrsou, Repúblika Dominikano, Repúblika di Pueblo di China, Sur-Korea, Rusia, Spaña, Fransia, Luxemburgo, Ulanda i Rumania. E presidensia ta den man di Sr. M. Iacob Baciu (SER Rumania). Sr. Francisco Gonzalez de Lena (SER Spaña) ta fungí komo Sekretario-general.

Kuminsamentu di mart otro aña representantenan di e konsehonan sosial-ekonómiko akí lo ta presente na Kòrsou, huntu ku opservadónan di ILO i ECOSOC, pa kontinuá ku e debate relashoná ku e tema menshoná i interkambiá  best practices riba e tópiko. Pa un resúmen di e konklushonnan di e Reunion General klek akí pa e tekstonan na ingles i franses. Pa un resúmen breve di e desishonnan di e interkambionan durante e Reunion General klek akí.

Riba e promé potrèt: un potrèt di grupo di e Reunion General na Paris.

Riba e di dos potrèt: e delegashon  di SER-nan di Reino di robes pa drechi: sr. Raul Henriquez (Direktor/Sekretario general di SER di Kòrsou), sra. Miloushka Sboui-Racamy (konsehoro prinsipal), sra.Veronique Timmerhuis (Direktor/Sekretario General di SER di Ulanda) i sr. Felix Bijlhout (Sekretario General di SER Aruba).

.Riba e di tres potrèt: e miembronan di delegashon di Kòrsou.