Persbericht

Frakshon di MAN ta duna splikashon adishonal na SER riba inisiativa di proyekto di lei pa introdusí un penshun básiko obligatorio pa tur empleado

WILLEMSTAD, 26 di sèptèmber 2018 – Un delegashon di frakshon di MAN den parlamento tabata di bishita awe mainta na Konseho Sosial Ekonómiko (SER) kaminda, durante un reunion preparatorio di e Konseho, e frakshon a duna un splikashon adishonal riba e inisiativa di e proyekto di lei ku el a entregá previamentente pa introdusí un penshun básiko obligatorio pa tur hende ku ta empleá.

Na mei di e aña aki, Konseho Sosial Ekonómiko a saka un konseho ekstenso kaba riba e inisiativa di e proyekto di lei (initiatiefontwerplandsverordening houdende regels inzake het wettelijk basispensioen), den kua el a rekomendá e frakshon pa entre otro hasi sierto adaptashonnan i rekonsiderá algun aspekto relatá na e tema. E konseho aki ta riba wepsait di SER (https://ser.cw).

Durante e enkuentro di awe mainta, e frakshon a aklará sierto puntonan i a duna informashon adishonal enkuanto e proyekto di lei ku tin komo meta pinsipal pa yega na un sistema di penshun obligatorio pa tur hende ku tin un empleo. Basá riba e splikashon i e informashon ku a ser duná, SER lo bolbe deliberá, den su seno pa asina e trayekto legislativo por kontinuá.

Riba e foto: e miembronan di delegashon di frakshon di MAN durante nan enkuentro ku SER. Di robes pa drechi: parlamentarionan sr. Plet, sra. Roozendal i sr. Hato akompañá pa e eksperto riba tereno di penshun sr. Pichardo.

Share